Quai resulta da la decisiun da la dretgira, che l'Agentura da novitads AFP ha pudì prender invista gievgia. La dretgira la pli auta da la Frantscha ha refusà il recurs da la banca encunter la citaziun da la dretgira penala da Paris.
L'anteriur manader da la revisiun interna da l'UBS en Frantscha sco er in'anteriura emploiada dal marketing – omadus èn entant relaschads – han contribuì da scuvrir praticas dal concern svizzer, quai la fin dals onns 2000. Il resultat eran inquisiziuns pervi da fraud fiscal.
2017 ha in derschader ordinà che la UBS sto davant dretgira pervi da la renfatscha da mobbing encunter ils dus ex collavuraturs. La persecuziun pervi da dus auters delicts aveva la dretgira lura dentant sclaus. Suenter bler vi e nà pervi da dretgs da procedura ha la chombra d'inquisiziun da la Dretgira d'appellaziun cità la banca l'entschatta mars. Quai pervi da mobbing, dentant er perquai ch'i hajan impedì las instanzas pariteticas per dumondas da sanadad en lur lavur sco er pervi da l'emprova d'influenzar perditgas davant dretgira. Questa decisiun è uss definitiva.
In advocat da l'UBS Frantscha n'haja betg reagì sin dumonda da l'agentura da novitads franzosa AFP.