La cumissiun da sanadad propona primo da dar dapli rabats sin premias a giuvens creschids, per che quels stoppian pajar damain en la gulivaziun da la ristga. Secundo duai la reducziun minimala da las premias vegnir augmentada per uffants e giuvens creschids en scolaziun.
Fin 50% damain pajaments per gulivaziun da ristgs
Concret duajan las cassas da malsauns sbassar ils pajaments da la gulivaziun da la ristga per giuvens creschids (19-25 onns) per 50%, per creschids tranter 26 e 35 onns per 20%. Ils assicuraders stuessan uschia pajar mintga mais radund 92 francs damain per giuvens creschids e 29 francs damain per ils creschids tranter 26 e 35 onns.
Assicurads sur 36 pajassan dapli premias
Tras quai sbassament pudessan las cassas da malsauns sbassar lur premias sumegliantamain. Da l’autra vart stuessan las cassas pajar 19 francs per mais dapli per ils assicurads sur 36 onns – e pretender dapli premias da quels.
RR novitads 18:00
