La Banca naziunala svizra sa dosta cunter las pretensiuns da la politica. Quellas fetschian quittads, ha la presidenta Barbara Janom Steiner ditg a la radunanza generala. I dettia adina dapli propostas co duvrar ils gudogns e la facultad da la banca.
Fin 6 milliardas francs per Confederaziun e chantuns
Da suandar a las pretensiuns da la politica na saja però betg ina buna idea, uschia Barbara Janom Steiner ch'argumentescha cun l'incumbensa legala che la banca ha. Mintg'onn distribuescha la Banca naziunala svizra fin a 6 milliardas francs a Confederaziun e chantuns.
I dettia oravant tut dus arguments principals da betg midar insatge vid la cunvegna da pajament ch'il Departament federal da finanzas ha fatg cun la banca naziunala. Per l'ina vegnian ils meds finanzials che stattan a disposiziun per ina distribuziun survalitads, e per l'autra engrevgiass in spartavias per intents spezials d’ademplir il mandat da la BNS, ha ditg la presidenta dal cussegl da la banca naziunala svizra.
102 milliardas reservas da distribuziun l'onn 2021
L'onn 2021 ha la SNB gì ina reserva da distribuziun da 102 milliardas. La SNB veglia dentant adina pudir garantir ina constanta distribuziun dal gudogn perquai ch'i dettia era pli schlets onns.
