Siglir tar il cuntegn
Inhalt

Svizra Dominique de Buman – il pli aut Svizzer

Suenter 14 onns en il Cussegl naziunal è il cristiandemocrat Dominique de Buman vegnì elegì sco president dal Cussegl naziunal.

Dominique de Buman vi da discorrer
Legenda: Dominique de Buman è vegnì elegì sco pli aut Svizzer. Keystone

Cun 160 da 179 vuschs valaivlas è il cusseglier naziunal Friburgais Dominique de Buman vegnì elegì a l'entschatta da la sessiun d'enviern. De Buman è il 25avel politicher da la PCD ed il 5avel represchentant dal chantun Friburg sin la sutga dal pli aut Svizzer.

De Buman – era en auters secturs il president

L'um da 61 onns s'engascha adina puspè per minoritads linguisticas en Svizra e per ils interess dals «Latins». El è l'anteriur president da la «Helvetia Latina». In'auter tema central per de Buman è il turissem. Era l'Uniun da turissem svizra e da l'Uniun da pendicularas svizra presidiescha el.

Il sigl a Berna

Cumenzà ha il giurist sia carriera en la veglidetgna da 30 onns. El è vegnì commember da la regenza da la citad da Friburg, dal Cussegl grond friburgais e dal parlament dal chantun. Durant 10 onns è el stà il president da la citad da Friburg.

2003 ha el fatg il sigl a Berna sco cusseglier naziunal. Trais giadas è el vegnì reelegì ed ha lavurà en differentas cumissiuns. E dal 2004 enfin 2016 è el stà in dals vicepresidents da la PCD.

In tip giagliard

Il cristiandemocrat vala sco tip giagliard, ma era sco communicatur. El è fitg collià cun sias ragischs ed ha cumbattì per che la bieraria da Cardinal na vegnia betg serrada da Feldschlösschen en ils onns 90. Grazia a sia campagna ha il manaschi anc pudì surviver in pèr onns.

Plinavant vuleva de Buman era scumandar il diever da tastgas da plastic a diever unic. Era sche il parlament ha la finala betg realisà il scumond, ha de Buman uschia savì sensibilisar la branscha sezza ed en plirs affars n'èn las tastgas da plastic almain betg pli gratuitas.

RR novitads 16:00