Siglir tar il cuntegn

Header

Navigaziun

cuntegn

Donaziun d'organs Cussegl federal vul vinavant che parents pon decider

Dasper la pussaivladad ch'ils parents pon decider davart ils organs, duai dar ina plattafurma ch'ins po sa registrar, sch'ins na vul betg dar enavant ses organs. Il Cussegl federal trametta la cuntraproposta indirecta a l'iniziativa che vul promover la donaziun d'organs en consultaziun.

L'iniziativa che vul promover la donaziun d'organs vul che mintgina e mintgin daventa automaticamain in donatur d'organs sch'el u ella n'è durant sia vita betg s'exprimida cunter quai. Quai è ina midada dal sistem per che dapli persunas pudessan vegnir spendradas mintg'onn entras donaziuns. L'onn passà èn mortas 68 persunas ch'eran sin ina glista da spetga per in organ.

Al Cussegl federal va questa proposta dentant memia lunsch. El vul stgaffir in register nua ch'ins po sa registrar a moda simpla sch'ins na vul betg dar ses organs. El vul dentant er ch'ils confamigliars pon vinavant avair l'ultim pled en chapitel sche la persuna n'è betg s'exprimida cleramain cunter ina donaziun durant sia vita. En blers pajais europeics haja quai meglierà la situaziun.

Premissas per donaziun d'organs na sa midan betg

Vinavant resta dentant tuttina ch'ina persuna po be lura dar ses organs sch'ella è morta cerebralmain u sch'ella ha gì ina fermada dal cor e la circulaziun. Sch'insatgi mora ordaifer l'ospital n'è ina donaziun betg pli pussaivla.

Ord l'archiv:

Legenda: Guardar il video Tgi che na di betg «na» è donatur d'organs. Durada 00:54 minutas.
Or da Nouvo RTR dals 28.08.2017.

RR novitads 12:00