En Svizra mancan organs per transplantaziuns. 83 persunas ch'eran sin ina glista da spetga per ina donaziun d’organs èn mortas l’onn passà. Quai scriva il «SonntagsBlick» sa referind sin la fundaziun Swisstransplant.
Era quest onn na para la situaziun betg dad esser meglra. En ils emprims trais mais da quest onn sajan gia mortas 29 persunas che spetgavan sin in nov organ. Quai ha confermà ina pledadra da Swisstransplant a l’agentura da novitads Keystone/SDA. En tut hajan la fin da quest quartal spetgà 1'447 pazientas e pazients sin almain in organ. Quai sajan tschintg persunas dapli che la fin da l'onn 2022. Plinavant stoppian ils pazients per part spetgar bunamain in onn sin ina transplantaziun. En quest temp sa pegiureschia il stadi da sanadad savens.
Nova lescha da transplantaziun va en vigur il pli baud il 2025
Cun la nova lescha da transplantaziun speran ins che la situaziun sa meglierescha. Tenor quella sto ina persuna u ses confamigliars che na vulan betg donar organs metter explicitamain en scrit quai. Il suveran svizzer ha vuschà ed acceptà la nova lescha l’onn passà. Ella va en vigur il pli baud il 2025.
