Sa fatschentar cun l’atgna mort fa tema, perquai na vegn quai betg fatg savens. In ulteriura raschun pudess esser l’idea ch’ils medis decleran insatgi pli spert mort, sch'el è donatur d’organs. Quai na possia betg capitar, sincerescha Candinas, las leschas en Svizra sajan fitg severas. E l’olma? Tgi di che l’olma è sa distatgada dal corp, cura ch’ils organs che vivan anc vegnan prendì dal corp dal donatur? Quai è ina dumonda difficila per il medi, el è dentant da l’avis, ina giada ch’il tscharvè è mort, n’è l’olma era betg pli d'enturn.
Register duai levgiar da chattar donaturs
La mesadad dals confamigliars na sa betg, sche la persuna defuncta avess ditg gea ad ina donaziun d'organs. Sin 100 defuncts vegn chattà sulet tar tschintg persunas il permiss sin cartas da donaziun, ha declerà Pierre-Yves Maillard, il president da la fundaziun Swisstransplant. Lezza lantschescha perquai in register da donaturs d'organs. En quel pon ils umans fixar, sch'els vulan dar lur organs u betg. Davent dad oz pon persunas che han almain 16 onns sa laschar inscriver en il nov register.
Festivar duas giadas natalizi ad onn
Pazients e pazientas, che hajan survegnì transplantà in organ, festiveschian duas giadas ad onn natalizi, di Daniel Candinas, professer per chirurgia a l’universitad da Berna e directur da la clinica per chirurgia e medischina viscerala e transplantaziuns. In organ saja in regal da solidaritad da la societad. Candinas transplantescha dapi 30 onns organs, l’aspect tecnic saja daventà in pau rutina, dentant ord vista umana, emoziunala, saja mintga transplantaziun in eveniment extraordinari.
Quai dat in liom fitg ferm cun ils pazients e las pazientas. Pli dramatic, pli extrem ch’igl è stà, e pli ferm che quest liom è.
Ina transplantaziun salva dentant betg adina en mintga cas il pazient u la pazienta. 10 enfin 20 pertschient na survivan betg l’emprim onn suenter la transplantaziun. Cas che muventan il medi Daniel Candinas. Transplantaziuns hajan in plaz spezial en sia regurdientscha, cunquai che blera glieud saja involvida.
RR actualitad 07:00
