Siglir tar il cuntegn
Inhalt

Svizra Donns da 170 milliuns tras malauras

Donns tras aua gronda, sbuvaditschs, bovas, crudada da crappa e grippa en Svizra han custà l'onn passà radund 170 milliuns francs. Quai è la pli auta summa da donn dapi il 2007.

Chasas circumdadas da glera e grava.
Legenda: Bondo, ils 25 d’avust 2017, suenter l’emprima bova. Keystone

Ils pli gronds donns haja quai dà vi da bajetgs tras aua. Quai mussa la banca da datas davart ils donns da malaura dal WSL, l'institut per la perscrutaziun da guaud, naiv e cuntrada.

Radund 94% dals donns sajan vegnids chaschunads tras auas e bovas e suenter ferms urizis, scriva il WSL. Ils pli gronds donns ha quai dà a Bondo e a Zofingen en il chantun Argovia.

Urizis a San Murezzan

Ils 28 da matg han fermas plievgias mess en moviment ina gronda massa da grava e glera che han stuppà in aual e inundà in areal d’industria.

Ils donns da 170 milliuns èn però lunsch davent da quels da 700 milliuns dal 2007. Els èn era sut la media da 307 milliuns dapi il 1972, dapi che las datas vegnan registradas. Ils pli gronds donns ha quai dà il 2005 cun 3 milliardas francs.

Otg morts a Bondo

A Bondo èn mortas otg persunas. Ellas eran sin turas en muntogna ed èn disgraziadas cun vegnir da la chamona Sciora giu la val. Fin oz n’èn ellas betg vegnidas chattadas.

La bova a Bondo è ina da las pli grondas en Svizra dapi passa 130 onns. Var 3,1 milliuns meters cubic material èn crudads dal Piz Cengalo a val. Las bovas da glitta e glera han lura transportà 500’000 meters cubic material fin a Bondo. Il donn material vegn stimà sin var 41 milliuns francs.

Banca da datas per valitar ils privels

L’institut da perscrutaziun WSL rimna ils donns da malaura sistematicamain dapi il 1972. La banca da datas cuntegna indicaziuns areguard donns tras aua gronda, sbuvaditschs, bovas e crudada da crappa. Las datas èn ina basa impurtanta per valitar ils privels. Betg cuntegnì en la banca da datas èn, tranter auter, lavinas, terratrembels e tempesta.

RR novitads 10:00