L'onn passà han ils baus-scorsa infestà en Svizra 3% dapli lain cumpareglià cun l'onn avant. En tut han ins annunzià 8'000 gnieus da bau-scorsa, quai è in augment da 1'000 tocs, ha communitgà l'Institut federal per la perscrutaziun da guaud, naiv e cuntrada.
Ina da las raschuns saja la sitgira da la stad 2022. Sch'ils pigns n'han betg avunda aua na pon els betg sa defender uschè bain cunter il bau-scorsa. Pertutgads il pli fitg dal bau-scorsa èn stads ils chantuns Vad e Neuchâtel.
In ulteriur motiv per la multiplicaziun pli intensiva dal bau èn gronds donns da tempesta vi dals guauds il zercladur 2021. Nua che la laina donnegiada n’ha betg pudì vegnir transportada svelt, hai dà al bau-scorsa cundiziuns da multiplicaziun idealas. Sche l’aura restia vinavant surproporziunal chauda e sitga, vegnia l’infestiun, en spezial da pigns, a s’augmentar er l’onn 2023, hai gì num vinavant.
