Siglir tar il cuntegn

Header

Las auas grondas en il Valais, fotografà ils 3 da matg 2015 a Champery.
Legenda: Forzas natiralas sfranadas: Auas grondas en il Valais, fotografà ils 3 da matg 2015 a Champery. Keystone
cuntegn

Svizra Donns natirals da l'onn passà custan 135 milliuns francs

Durant l’onn 2015 ha la natira chaschunà uschè blers donns sco dapi set onns betg pli. Ils custs totals da 135 milliuns francs resultan d’auas grondas suenter urizis, da bovas e da crudada da crappa e grippa.

Malauras han custà l'onn passà uschè bler sco ditg betg pli. Ils custs da 135 milliuns francs sa resultan en spezial d'auas grondas suenter urizis, da bovas e da crudada da crappa e grippa. Quai communitgescha l'Institut federal per la perscrutaziun da guaud, naiv e cuntrada WSL. Il matg ed il zercladur eran ils donns entras auas grondas sur la media. Sulet il zercladur ha chaschunà 70% da tut ils custs. Davent il fanadur hai dà pli paucs donns che usità.

Bler'aua, duas unfrendas

La Svizra Centrala ed ils chantuns Turitg, Berna, Turgovia e Son Gagl han patì da dus urizis. Pervi da quels eran pliras auas idas sur lur rivas or. Duas persunas eran mortas en consequenza.

Gronds donns hai gia dà il matg, cura ch’intginas auas avevan cuntanschì il nivel d’aua gronda suenter plievgias cuntinuantas. Pertutgads da quai eran cunzunt il sid dal Jura, la cuntrada dals lais en il chantun Berna sco er ils chantuns Vad e Friburg.

Pli paucs donns en segund semester

Vers mez da fanadur aveva quai plinavant dà en l’Engiadina Bassa urizis locals cun consequenzas custaivlas: 18 bovas hai dà suenter ils urizis tranter la Val d’Uina e la Val Plavna. Las massas d’aua han emplenì plaunterrens e tschalers. Ultra da quai èn fatschadas da chasas, autos e terrens cultivabels vegnids donnegiads.

Las quantitads da precipitaziuns èn però stadas sut la media, uschia ch’era ils custs dals donns era pli pitschna.

RR novitads 14:00

sda/alb

Artitgels legì il pli savens

Nach links scrollen Nach rechts scrollen