Svizra - Dretg internaziunal duai restar sur il dretg naziunal
Il dretg internaziunal stat sur il dretg naziunal era sch'il pievel n'ha betg pudì s'exprimer latiers. Quai vala il mument e duai era restar uschia en l'avegnir sch'i va tenor Cussegl federal. El respunda uschia ad in postulat da la PLD.
Il Cussegl federal refusa uschia da definir reglas per contracts da dretg internaziunal tenor lur legitimaziun democratica.
L'idea era da valitar il pli aut la constituziun e contracts da dretg internaziunal ch'èn suttamess al referendum obligatoric. Talas reglas empermettian transparenza, scriva il Cussegl federal. En la pratica saja quai dentant mo per part realisabel ed il problem vegnia mo spustà.
