Dretgira da Turitg refusa plant da milliardas da Sabena

Il grounding da la Swissair avant 16 onns occupa anc adina las dretgiras: La mesemna è vegnì publitgà, che la dretgira superiura da Turitg refusa in plant da milliardas dals liquidaturs da la Sabena. Quai rapporta l'agentura da novitads svizra SDA.

In aviun parcà. Bild in Lightbox öffnen.

Legenda da maletgs: In aviun da la Sabena al di dal grounding il 2001 a Brüssel. Keystone

L’onn 1995 aveva la societad aviatica Swissair surpiglià 49,5% da la societad aviatica beltga Sabena, ch’aveva gia lura auts debits. Sis onns pli tard è dà ensemen l’entir construct dal S-Air-Group cun la Sabena e la Swissair.

Liquidaziun da Swissair n'è anc adina betg a fin

Dapi il 2001 vegnan las 261 parts da la S-Air-Group liquidadas, tranter quellas er la Sabena en la Belgia. Enfin uss ha il liquidatur da la Swissair Karl Wüthrich gia approvà pretaisas da radund 15 enfin 20 milliardas francs dals crediturs. Da quellas pertutgan pretaisas da 382 milliuns la Sabena.

Beltgs na vulevan betg mo 382 milliuns francs

Quai na bastava betg als liquidaturs da la Sabena: Els han pretendì 2,38 milliardas francs dal relasch da la SAirGroup. Uschè aut saja stà il donn che la Sabena haja subì perquai che la SAirGroup n’haja betg tegnì en in contract cuminaivel, il Astoria-Agreement.

Ils liquidaturs da Sabena na vulan betg ir avant Tribunal federal

Per las dretgiras turitgaisas n'eran quellas pretaisas betg giustifitgadas. Suenter la dretgira districtuala ha uss er la dretgira superiura da Turitg refusà la pretaisa da 2,38 milliardas francs. La dretgira superiura ha be consentì ulteriuras pretaisas da 28 milliuns francs.

Ils liquidaturs da la Sabena na survegnissan dentant betg tut la summa, mabain be la dividenda da concurs – quai che correspunda a 18,5% da lur pretaisas, scriva l'agentura da novitads svizra SDA. Tuttina na tiran ils liquidaturs da la Sabena betg vinavant la decisiun al Tribunal federal, citescha la SDA il liquidatur da la Swissair Karl Wüthrich.

Liquidaziun da Swissair cuntinua

Quant lunsch ch’i va, fin che la SAirGroup è liquidada dal tuttafatg na saveva Wüthrich anc betg dir, concluda l’agentura da novitads svizra SDA ses artitgel. Wüthrich speria dentant, da pudair finir ils projects pendents aifer ils proxims dus onns.

Uschia furma la decisiun dal tribunal superiur in ulteriur crap da mosaic en l'istorgia dal pli grond bancrut d'ina firma svizra.

RR novitads 06:00