L’interess public da persequitar delicts cun drogas saja pli grond che l’interess da proteger funtaunas, aveva il Tribunal federal argumentà sia sentenzia. Il Tribunal europeic dals dretgs umans è stà d’auter avis. La Svizra haja violà il dretg da libertad d'exprimer l'opiniun.
Il cas aveva cumenzà il 2012 cun il rapport d'ina schurnalista da la «Basler Zeitung» davart in dealer da haschisch e cannabis. La polizia da Basilea ha vulì che la schurnalista tradeschia da tgi ch'i sa tractia, per uschia pudair identifitgar il dealer. Cura che lezza ha refusà da tradir quai è il cas vegnì il 2014 davant il Tribunal federal. Quel era dal medem avis sco la procura publica, che la dunna stoppia tradir sia funtauna. Ils derschaders a Strasbourg èn uss vegnids a la conclusiun che quai cuntrafetschia als dretgs umans che garanteschan la libertad d'opiniun.
Protecziun da funtaunas sco impurtanta pitga da libertad da pressa
En ina societad democratica saja la protecziun da funtaunas in'impurtanta pitga da la libertad da pressa. L'obligaziun da schurnalists, da tradir l'identitad d'ina funtauna saja be lura d'accordar cun ils dretgs umans, sche l'interess public saja predominant. En quest cas n'han ils derschaders a Strasbourg betg pudì confermar quai.
