- La nova drona d'exploraziun per l'armada è en privel da far naufragi. Il Departament federal da defensiun ponderescha d'interrumper il project da 300 milliuns francs. Quai mussan retschertgas da SRF.
- La raschun èn gronds retards, pannas e problems cun la qualitad.
- Il minister da defensiun Martin Pfister decida fin la fin da stad.
Il clima vegn ad esser stà tendì, cura ch'il schef da l'armament svizzer Urs Loher è s'inscuntrà sin la Cipra cun la direcziun dal concern d'armas israelian Elbit. Ina giada dapli n'haja Elbit betg resguardà termins, ina giada dapli dettia retards cun la drona, conferma Loher en la Samstagsrundschau da SRF: «Il sistem per atterrar automaticamain avess duì arrivar il settember. Quest term impurtant n'è betg vegnì accumplì. Nus avain separà il termin sin il schaner e sin la fin da zercladur da quest onn – ed era quests terms impurtants èn restads maculatura.»
Ditg in tabu – uss è in stop total realistic
Igl è in problem dapli en ina seria da problems: Tschintg da las sis dronas empustadas èn bain gia en Svizra. Dentant nagina schanza da duvrar ellas per observar ils cunfins u per furnir maletgs d'exploraziun a l'armada. Funcziuns impurtantas mancan anc, i dat retards e la qualitad da las dronas è manglusa.
Uss saja da discutar sch'il project duai insumma anc cuntinuar, di Loher: «Jau sun ditg stà da l'avis ch'in stop na vegn betg en dumonda. Dentant uss essan nus tar il punct nua ch'igl è da sa dumandar sch'il renomà davos dagut lascha ir surora il butschin.».
Il stop è ina da las trais opziuns. Las duas ulteriuras opziuns èn da cuntinuar sco fin ussa, quai ch'è strusch realistic, ni da desister da funcziuns impurtantas da la drona.
Cuntrapretensiuns ord l'Israel èn da spetgar
Da desister sin funcziuns impurtantas ed acceptar che la drona porscha damain pussaivladads fiss ina via d'amez, per tuttina anc evitar il stop. «La dumonda è tge che las restricziuns muntan – sche quellas èn uschè grondas ch'ils custs surpassan il niz», di il schef da l'armament Loher.
Da pasantar saja dentant era tar la varianta d'in stop – lura giaja en realitad l'entira summa da project da 300 milliuns francs a perder. Il schef da l'armament quinta vitiers cun cuntrapretensiuns ord l'Israel. La producenta Elbit sezza haja investì blers daners en la drona. «Persunalmain quint jau che Elbit arriva cun cuntrapretensiuns e ch'i suonda ina lunga dispita giuridica», di Loher.
Chalar u desister da funcziuns impurtantas – cun il ristg d'anc dapli problems? L'entschatta da l'emna han ils responsabels per la drona discutà la situaziun da partenza cun il nov minister da defensiun Martin Pfister.
La politica è dividida
Ils politichers e las politicras da segirezza n'han insumma betg spetgà quest svilup. «Fin uss hai adina gì num ch'in stop saja la mendra da tut las opziuns», di il cusseglier dals chantuns Josef Dittli da la PLD. El vul sche pussaivel cuntinuar cun la drona – sche la drona era cun restricziuns valia anc ses pretsch.
La politicra da segirezza socialdemocrata Franziska Roth percunter vuless serrar giu la forza al project. I dettia alternativas pli pitschnas e pli bunmartgadas: «Jau sun cleramain per il stop. La drona è concepida bler memia grond e na sa cunfa betg cun ils basegns actuals.» Enstagl d'avair giavischs spezials e far agens svilups, duai la Svizra collavurar en l'avegnir anc pli stretg cun ils partenaris europeics.
Scursanir las alas a la drona u laschar crudar ella dal tut? La decisiun è en ils mauns dal minister da defensiun Martin Pfister. El vegn probablamain a prender ina decisiun la fin da stad.