- La nova drona d'exploraziun per l'armada è en privel da far naufragi. Il Departament federal da defensiun ha ponderà dad interrumper il project da 300 milliuns francs. El vul dentant cuntinuar.
- Ins veglia dentant redimensiunar il project e desister da tschertas funcziuns.
- La raschun per il rumpachau da las dronas èn gronds retards, pannas e problems cun la qualitad.
Il clima vegn ad esser stà tendì, cura ch'il schef da l'armament svizzer Urs Loher è s'inscuntrà sin la Cipra cun la direcziun dal concern d'armas israelian Elbit. Ina giada dapli n'haja Elbit betg resguardà termins, ina giada dapli dettia retards cun la drona, conferma Loher en la Samstagsrundschau da SRF: «Il sistem per atterrar automaticamain avess duì arrivar il settember (2022). Quest term impurtant n'è betg vegnì accumplì. Nus avain separà il termin sin il schaner e sin la fin da zercladur da quest onn – ed era quests terms impurtants èn restads maculatura.»
In stop era realistic
Igl è in problem dapli en ina seria da problems: Tschintg da las sis dronas empustadas èn bain gia en Svizra. Dentant nagina schanza da duvrar ellas per observar ils cunfins u per furnir maletgs d'exploraziun a l'armada. Funcziuns impurtantas mancan anc, i dat retards e la qualitad da las dronas è manglusa.
Durant la stad è vegni discutà sch'il project duai insumma anc cuntinuar, aveva ditg Loher. In stop era ina da las trais opziuns. Las duas ulteriuras opziuns èn da cuntinuar sco fin ussa, quai ch'era strusch realistic, u da desister da funcziuns impurtantas da la drona. Quai ha il departament da defensiun uss decis.
Cuntrapretensiuns ord l'Israel èn da spetgar
Da desister sin funcziuns impurtantas ed acceptar che la drona porscha damain pussaivladads fiss ina via d'amez, per tuttina anc evitar il stop. «La dumonda è tge che las restricziuns muntan – sche quellas èn uschè grondas ch'ils custs surpassan il niz», di il schef da l'armament Loher.
Da pasantar saja dentant era tar la varianta d'in stop – lura giaja en realitad l'entira summa da project da 300 milliuns francs a perder. Il schef da l'armament quinta vitiers cun cuntrapretensiuns ord l'Israel. La producenta Elbit sezza haja investì blers daners en la drona. «Persunalmain quint jau che Elbit arriva cun cuntrapretensiuns e ch'i suonda ina lunga dispita giuridica», di Loher.
La politica è dividida
Ils politichers e las politicras da segirezza n'avevan insumma betg spetgà quest svilup. «Fin uss hai adina gì num ch'in stop saja la mendra da tut las opziuns», aveva ditg il cusseglier dals chantuns Josef Dittli da la PLD. El vul sche pussaivel cuntinuar cun la drona – sche la drona valia anc ses pretsch era cun restricziuns.
La politicra da segirezza socialdemocratica Franziska Roth percunter vuleva serrar giu la forza al project. I dettia alternativas pli pitschnas e pli bunmartgadas: «Jau sun cleramain per il stop. La drona è concepida bler memia grond e na sa cunfa betg cun ils basegns actuals.» Enstagl d'avair giavischs spezials e far agens svilups, duai la Svizra collavurar en l'avegnir anc pli stretg cun ils partenaris europeics.