Siglir tar il cuntegn

Header

audio
«Dry January»: desister in mais d'alcohol – tge fa quai cun il corp?
Or da Actualitad dals 10.01.2023. Maletg: Keystone
laschar ir. Durada: 2 minutas 41 Secundas.
cuntegn

«Dry January» Tge avantatgs ha in mais senza alcohol?

Durant ils dis da Nadal e Bumaun vegn gugent fatg viva cun in magiel vin, prosecco u in vinars. Per quels che vulan suenter lura desister per in temp da l'alcohol, datti il schaner il «Dry January». Per rumantsch: schaner sitg. E gia in mais senz'alcohol duess avair effects positivs sin il corp.

L'idea dal «Dry January» vegn oriundamain da la Gronda Britannia. Lura, avant diesch onns avevan organisaziuns da sanadad proclamà da desister per in mais da baiver alcohol, perquai ch'i deva blers mortoris pervia d'alcohol tar persunas tranter 14 e 49 onns.

In studi mussa effects positivs

Dapi intgins onns datti l'acziun dal «schaner sitg» era en Svizra. Quella vegn era sustegnida tranter auter da l'organisaziun crusch blaua e da l'associaziun professiunala da dependenzas. Tge effects positivs ch'in mais senza alcohol po avair, mussa in studi che l'Universitad da Sussex ha fatg l'onn 2018 cun 800 participants e participantas.

Tranter auter han els inditgà il suandant:

Avrir la box Serrar la box
  • 88% han spargnà daners
  • 80% han gì dapli controlla davart lur consum da baiver
  • 76% han emprais dapli davart cura e daco ch'els baivan
  • 71% han durmì meglier 
  • 70% han inditgà ch'els sa sentian pli sauns
  • 67% han gì dapli energia
  • 58% han pers paisa 
  • 57% han savì sa concentrar meglier
  • 54% han gì meglra pel  

    Ch'in mais senza alcohol po era a lunga vista esser bun per il corp, conferma Denise Zai dal post da sanadad dal chantun Schwyz, envers SRF.

Remartgabel è ch'ins ha, malgrà ch'ins desista be in temp d'alcohol, a lunga vista in consum d'alcohol pli conscient.
Autur: Denise Zai Post da sanadad dal chantun Schwyz

I possia esser che las persunas crodian puspè en musters usitads, dentant observan els sa sez meglier e san era plitost daco ch'els baivan insumma alcohol.

Bleras parts dal corp profiteschan

E pli ditg che la pausa d'alcohol duria e meglier che la pressiun dal sang, il magun ed il begl possian sa revegnir, di il schefmedi dal Center per medischina da dependenza Philip Bruggmann. Plinavant possia era la ristga per differentas sorts da cancer sa sminuir. Tge ch'ins stoppia dentant menziunar: Sch'ins baivia suenter quest mais puspè exact uschè savens ed uschè bler sco avant – lura laschian ils effects positivs suenter, di Denise Zai.

Bleras persunas giuvnas che sesan entuorn maisas radundas giuadora. Els baivan ina gervosa.
Legenda: Keystone

Tips per cuntanscher la finamira

Adina n'èsi dentant betg uschè simpel da dir Na sch'i vegn fatg amogna in drink – cunzunt sch'ins è da cumpagnia. Per tuttina cuntanscher la finamira datti differents tips:

  1. Envidar collegas da sa participar. Ensemen fai probabel dapli plaschair ed ins è pli motivà.
  2. Esser pertschert, daco exact ch'ins na vul betg baiver alcohol per in mais. Èsi per avair dapli energia u perquai ch'ins vul reflectar l'agen consum d'alcohol? Ils motivs pon esser differents e persunals.
  3. Ins na sto betg desister dal tuttafatg dal gust. Enstagl d'empustar in coctail cun, pon ins empustar in senza alcohol u sa decider per in'autra bavronda in zic pli extraordinaria.
  4. Sco per bler, datti era per il «Dry January» ina app ch'ins po persequitar il svilup e sche tut va bain, era il success.

RTR actualitad 08:00

Artitgels legids il pli savens