Il survegliader dals pretschs Stefan Meierhans crititgescha las autas taxas da banca en Svizra. Quellas sajan sa dublegiadas entaifer 20 onns. Las bancas impedeschian la concurrenza libra. El survegnia mintg’onn tozzels da reclamaziuns pervi da taxas exageradas. Quai ha ditg Meierhans a la «NZZ am Sonntag».
Er augments suenter il 2015
Blers instituts da finanzas hajan vinavant augmentà ils pretschs dapi l’ultima retschertga il 2015. Per exempel sajan da lez temp anc tut las purschidas dal conto da libra circulaziun stadas gratuitas. Ozendi mettia mintga terza banca a quint 36 francs per onn. Vitiers vegnian taxas per la gestiun dal conto, incumbensas da pajament, cartas da banca e transacziuns da devisas.
Tenor il survegliader dals pretschs duai il Secretariat da stadi per l’economia instradar in process da pilot per sclerir, sche la pratica da las bancas saja legala.
