La media da la rata da positivitad è il mument tar 14,7% Quai munta che prest 15 da 100 tests che vegnan fatgs, èn positivs. La valur critica da 5% è cunquai cleramain surpassada. Tenor la WHO s'augmenta uss il ristg ch'il dumber da cas positivs na mussa betg pli in maletg correct da la situaziun, co ch'il virus sa derasa.
Sch'il dumber dals cas s'augmenta, ma i na vegn betg testà dapli, èsi probabel ch'i dat in pli aut dumber da cas zuppads. En media èn vegnids fatgs ils ultims set dis mintga di 16'868 tests. Cumpareglià cun l'emna avant èn quai 38% dapli. Il BAG ha annunzià oz 14 novs mortoris. Las ospitalisaziuns èn s'augmentadas en la media da set dis sin 38 persunas. Quai èn 98% dapli che l'emna avant.
Er en Grischun s'augmenta dumber
En il Grischun sa chattan set persunas en ospital pervi dal coronavirus, 243 persunas èn en isolaziun e 628 en quarantina. Dapi il zercladur n'hai dà nagin mortori pli en il Grischun en consequenza dal virus.
