Siglir tar il cuntegn

Header

cuntegn

Svizra Dumengia da Tschuncaisma – colonnas en direcziun sid e nord

En direcziun sid ha il traffic er la dumengia da Tschuncaisma stagnà davant il portal nord dal Gottard. Enturn mezdi aveva la colonna tranter Amsteg e Göschenen cuntanschì ina lunghezza dad 8 km.

Tgi ch'ha vulì passentar ils dis da festa en il sid ha duvrà quest onn anc dapli pazienza ch’ulteriurs onns. Er la dumengia da Tschuncaisma hai dà colonnas davant il tunnel dal Gottard en direcziun dal sid. Enturn mezdi aveva la colonna cuntanschì ina lunghezza dad 8 km lunghezza ed il temp da spetga muntava a radund 1 ura e 25 minutas. Vers las 17:00 era la situaziun però puspè sa normalisada.

Dapi la dumengia a mezdi è er il traffic vers nord s'augmentà. Tranter Quinto ed Airolo hai dà l'entir suentermezdi ina colonna da var 3 km. Il temp da spetga ha muntà a 40 minutas. Er là è la situaziun sa normalisada vers saira: La colonna ha a las 17:30 anc gì ina lunghezza dad 1 km cun in temp da spetga da 15 minutas.

Colonna da record la sonda

La sonda aveva la colonna davant il portal nord dal Gottard cuntanschì ina lunghezza da 28 kilometers ed uschia egualisà il record dal 1999. Era lez onn era il tunnel dal San Bernardino stà serrà. Quai pervi dad inundaziuns.

Quest onn è el serrà pervi dad in incendi dal venderdi. Probabel resta il tunnel dal San Bernardino anc serrà per plirs. dis. Il traffic fin a 3,5 tonnas vegn svià sur il Pass dal San Bernardino. Rulottas ed il traffic da vitgira na dastgan dentant betg charrar sur il pass.

RR novitads 12:00

Artitgels legids il pli savens