Dus candidats vulan parter il presidi dals Giuvens liberals

Ultra da la PLD tschertga in’ulteriura partida in nov president: Andri Silberschmidt e Johanna Gapany candideschan per il copresidi dals Giuvens liberals svizzers (GLS). Quai han els communitgà communablamain. Uschia vulan els succeder a Maurus Zeier che demissiunescha il mars.

Cun lur candidatura per in presidi communabel vulan Andri Silberschmidt e Johanna Gapany rinforzar lur basa da votantas e votants sur ils cunfins da lingua.

Plinavant vulan els prender activamain influenza sin debattas politicas, cunzunt areguard ils temas prevenziun per la vegliadetgna e politica economica e sociala.

Johanna Gapany annunzia candidatura via Twitter

Tant Silberschmidt sco Gapany han gia fatg experientschas da gestiun. Il giuven da 21 onns è dapi il 2013 president dals Giuvens liberals dal chantun Turitg. E Gapany (27) dal Friburg è dapi il 2012 vicepresidenta dals Giuvens liberals svizzers.

L'elecziun dal nov president è a chaschun dal congress dals Giuvens liberals dals 11 fin ils 13 da mars a Berna.

RR novitads 14:00