Tgi che va cun in e-bike duai duvrar las vias da velo e dastga era charrar sin vias, ch’èn scumandadas per mopeds. E-bikes sajan pia cleramain dapli velo che moped, constatescha il cusseglier dals chantuns grischun Martin Schmid.
Malgrà quai tractia la lescha els, en tutta cas sch’i va per la lubientscha da charrar cun els, sco sch'els fissan in moped. Auter che per exempel en Germania u en l’Austria, nua che uffants da 12 onns dastgan gia charrar cun in e-bike, ston ils Svizzers esser almain 16 onns u, sch'els han la patenta da moped, almain 14 onns. Quai na saja betg gist, manegia il liberaldemocrat.
«Nus avain oz famiglias che vulan duvrar tuts ils medems velos, era ils e-bikes. Ultra da quai datti adina dapli regiuns en il Grischun che mettan a disposiziun tals velos. E nus avain constatà ch’i na dat betg dapli accidents sch’ins guarda en ils pajais vischins. Perquai duain ins liberalisar quai.» El propona perquai en ina moziun al Cussegl federal da sbassar la vegliadetgna per la lubientscha da charrar cun in e-bike sin 12 onns.
Schanza per il turissem muntagnard
Ina proposta che vegn era beneventada da Kevin Brunold, il manader da fatschenta da Surselva Turissem. Vacanzas da velo sajan adina pli dumandadas. Qua saja l'e-bike in'offerta fitg interessanta: «Quels che n’èn betg uschè bain cun velo pon ussa era surmuntar differenzas d’autezza. Gist en noss territori è quai fitg interessant da pudair charrar da la val enfin siadora sin la pizza. Blers na pudessan uschiglio gnanc far quai.»
Els veglian profitar dal trend e sajan perquai vidlonder d'engrondir la rait da vias per velos ed e-bikes, quai era cun staziuns per chargiar las battarias. Per che l'entira famiglia possia dentant giudair il viadi cun l’e-bike fissi da grond avantatg ch'era ils uffants davent da 12 onns possian sa participar, è Brunold persvas.
Cussegl federal tema dapli accidents
Il Cussegl federal è qua dentant fitg sceptic. En sia resposta ad in'autra moziun ha el scrit che e-bikes na sajan eba betg velos normals. Quai mussian era las autas cifras d'accidents.
Cun il sustegn dal motor cuntanschian ins autas spertadads e per garantir la segirtad saja impurtant ch'ils giuvens e-ciclists enconuschian era las reglas da traffic. Il pli simpel saja quai cun in examen da teoria sco per ils mopeds, manegia il Cussegl federal.
Uffants gia oz cun velo sin via
In'argumentaziun che na persvada betg propi Martin Schmid. «Nus vegnin ad avair adina dapli velos cun in tschert sustegn, quai è in cler trend. Jau na cumpart betg l’argumentaziun che quai vegn a manar a dapli accidents. Ils uffants èn gia oz cun ils velos senza motor sin las vias.»
Che la segirtad è impurtanta, chapescha Kevin Brunold. I dettia dentant segir er autras vias. «Ins pudess era ponderar da limitar da vart dals producents il tempo dals e-bikes. Da l’autra vart datti era curs da Swiss Cycling Guide e ch’ins pudess dir che pli giuvens stuessan far in tal curs. Dentant betg via la patenta da moped.»
Consultaziun per nova lescha la fin dal 2019
Ch'i dovra in'adattaziun da la lescha para era il Cussegl federal d’avair sentì. El ha perquai annunzià da vulair preschentar la fin da quest onn ina revisiun da la lescha da traffic che duai era reglar da nov las lubientschas per e-bikes.
RR actualitad 08:00