E-bikers sa blesseschan pli savens grevamain vid il chau, che tgi che va cun in velo senza motor. E quai malgrà che e-bikers portan dubel uschè savens ina chapellina. Quai mussa in studi da l’Ospital universitar da Turitg ch'ha intercurrì accidents cun velo, e-bike e töf.
Il tip da las blessuras tar ils accidents cun e-bikes saja pli sumegliont a quellas belssuras suenter accidents cun velo che quels cun töf. Ils e-bikes van bain pli spert che velos – però è la differenza da tempo tar ils töfs tuttina pli gronda, argumentescha il studi questa conclusiun.
Il studi concluda vinavant che tgi ch’ha gì in accident cun in e-bike è en media marcantamain pli vegl. Concret è la vegliadetgna media tar ils accidents cun e-bike tar 56 onns – tar ils velos èsi 42 onns. E malgrà che 73% dals e-bikers avevan ina chapellina (tar ils velos 38%) resultan tar e-bikes pli savens traumas grevs da la chavazza e dal tscharvè e blessuras da la batschida.
Sin basa da questas cifras suttastritga l'Ospital universitar da Turitg l'impurtanza e necessitad da la chapellina. Ed ultra da quai recumondani curs dad ir cun e-bikes surtut a persunas pli veglias e betg trenadas.