Ils chantuns Friburg, Neuchâtel, Turgovia e Basilea-Citad vulevan duvrar il sistem da La Posta per pussibilitar a lur burgais en l'exteriur da pudair sa participar a las elecziuns federalas da quest october. Quai croda ussa en l'aua. Sco quai che l'agentura da novitads SDA scriva, èn ils responsabels da Friburg e Neuchâtel gia en contact cun La Posta Svizra. La Turgovia e Basilea-Citad sajan anc vid ponderar lur proxims pass.
Quant autas che las pretensiuns per indemnisaziuns èn, na vuleva nagin tradir. Fatg è dentant ch'il chantun Friburg ha investì ils ultims trais onns prest in mez milliun francs en e-voting.
«No comment» da La Posta
La Posta Svizra sezza na vul il mument betg prender posiziun en connex cun eventualas indemnisaziuns. Ins saja dentant en stretg contact cun ils chantuns pertutgads, hai num.
Avant diesch dis ha gia il chantun Genevra sistì ses sistem dad e-voting, uschia ch'i na dat il mument en l'entira Svizra nagina pussaivladad pli da votar a moda electronica.
RR novitads 18:00