Siglir tar il cuntegn

Header

Ina tastatura ed in cedel da vuschar che simboliseschan e-voting.
Legenda: E-voting Malgrà temas areguard la segirezza datti grond sustegn persuenter. Keystone
cuntegn

Svizra E-voting ha bler sustegn – segirezza sco punct critic

Las Svizras ed ils Svizzers beneventan l'introducziun dal vuschar electronic, quai malgrà che l'uschenumnà ‘e-voting’ vegn classifitgà sco main segir ch'il vuschar a l'urna u en scrit. Quai resulta d’in’enquista da l’institut Link per incumbensa dal «Center per democrazia» ad Aarau.

Passa dus terzs dessan gugent giu lur vusch online, 29% èn encunter. Surtut ils giuvens ch'èn vegnids dumandads vesan l'introducziun da l’e-voting sco indispensabla. Però er ta las persunas sur 70 è la mesadad per introducir l'e-voting. L’institut Link ha dumandà totalmain 1’523 persunas en tutta Svizra.

Dubis areguard segirezza

Dasper il tenor ch’è per gronda part positiv datti era dubis pervi da la segirezza. Uschia èn 61% da l’avis che votaziuns via internet pon vegnir manipuladas pli simpel che votaziuns per brev. 57% dals dumandads teman schizunt che servetschs secrets da l’exteriur pudessan avair invista en las votaziuns.

Tenor il Centrum per democrazia mussia la retschertga che la populaziun è conscienta dals ristgs da votaziuns ed elecziun. Entant saja la digitalisaziun uschè derasada che l’introducziun da l’e-voting fiss ina consequenza logica.

RR novitads 12:00