Trais uniuns bandunan «Economiesuisse». Envers SRF ha la federaziun tetgala da l'economia svizra confermà in artitgel da la NZZ. Tar las uniuns che vulan bandunar «Economiesuisse» sa tractia da Swiss Retail, Auto Svizra e Avenergy.
Tar Auto Svizra (represchenta circa 4'000 commerziants d'autos, tranter quests la AMAG) ed Avenergy (l'anteriura uniun dad ieli) haja la sortida da far cun la dispita da la politica da clima e cun ils custs.
Cunzunt la sortida da Swiss Retail, la federaziun da las interpresas da commerzi en detagl, è da gronda muntada. La contribuziun annuala tar Economiesuisse dependa numnadamain da l'impurtanza finanziala da l'uniun. Swiss Retail fa mintg'onn ina svieuta d'enturn 20 milliardas francs.
En general han las uniuns l'impressiun che lur interess na sajan betg pli represchentads entras economiesuisse. Er parts da l'economia da firmas pitschnas e mesaunas cumenzan a volver il dies a la federaziun tetgala. Sper ils motivs da la politica da clima gioga era la posiziun d'economiesuisse tar l'iniziativa per concerns responsabels ina rolla.