Siglir tar il cuntegn

Header

Telefonins da Huawei.
Legenda: Huawei vul investir en la perscrutaziun en Svizra. Keystone
cuntegn

Economia Huawei vul stgaffir 1'000 plazzas da lavur en Svizra

Il concern da tecnologia chinais Huawei vul investir en la perscrutaziun en Svizra. Planisà èsi da stgaffir plazzas per perscrutaders en diversas scienzas natiralas.

Sco Felix Kamer, il vice-schef da Huawei Svizra ha ditg envers la Tagesschau da SRF, disscurian els actualmain da stgaffir plazzas per radund 1'000 perscrutaders en Svizra. Ils daners per quai duain vegnir investids en in u probabel dus centers. En tge spazi da temp che quests plans duain vegnir realisads, n'ha el dentant betg tradì.

L'emprim stoppian anc vegnir definids ils temas da perscrutaziun. Latiers stettian cumpetenzas en il center, tar las qualas la Svizra saja ferma e che sajan a media vista impurtanta per Huawei. Quai tschertgian els surtut en ils roms fisica, scienzas da computer, tecnologia nano, scienzas da material ed ulteriuras scienzas natiralas, ha declerà Kamer.

Huawei è dentant actualmain sut squitsch: L'emna passada han ils Stadis Unids mess Huawai sin ina glista naira. Google ed il constructur da chips ARM han sistì lur relaziuns da fatschenta cun Huawei.

RR novitads 06:00