Siglir tar il cuntegn

Header

cuntegn

Economia Incumbensa gronda per Stadler Rail en Ungaria

Il constructur da trens Stadler Rail survegn in'ulteriura incumbensa gronda da l'Ungaria. Las viafiers statalas da l’Ungaria han pustà 21 ulteriurs trens da dus plauns per 313 milliuns euros. Quai ha communitgà l’interpresa svizra.

Avant dus onns avevan els suttascrit ina cunvegna da basa per totalmain 40 trens. L'avust han las viafiers statalas empustà 11 trens ed il 2018 otg trens. Cun ils 21 trens da l'empustaziun actuala han ellas tratg a niz l'entir contingent da 40 trens.

L'intern dal model KISS che Stadler Rail producescha.
Legenda: L'intern dal model KISS che Stadler Rail producescha. Keystone

Plaz per 600 persunas

Il davos tren duai vegnir furnì enfin la fin dal 2022, hai num vinavant en la communicaziun. Las cumposiziuns da tals trens han ina lunghezza da 156 meters, consistan da mintgamai sis vaguns e porschan plaz a 600 persunas. Plinavant profiteschan passagiers d'ina climatisaziun e WLAN en il tren. Ils vehichels dal traffic public pon charrar cun ina sveltezza da fin 160 kilometers per ura sin ils trajects modernisads en l'Ungaria.

Trams per Germania

Pir ier aveva Stadler Rail infurmà davart in'incumbensa gronda da la Germania. Per 62 milliuns euros po il constructur da vehichels sin binaris furnir 14 trams a Darmstadt. Tenor la communicaziun existia l'opziun da furnir 30 ulteriurs vehichels. I saja l'emprima giada che Stadler vendia in tram da la nova seria.

RTR novitads 09:00

Artitgels legids il pli savens