Il barometer da conjunctura da la Scola politecnica federala (KOF) resta per il mument sur la media. Il schaner 2022 è'l puspè s'augmentà levet per 0,6 sin total 107,8 puncts. Quai è era levet dapli ch'ils experts avevan quintà. Sin dumonda da l'agentura da novitads dals martgads (AWP) avevan lezs spetgà tranter 104 e 107 puncts. Uschia sajan las perspectivas per l'economia svizra vinavant sur la media e cleramain meglras ch'anc l'onn passà, han declerà ils economs dal KOF. I dependia però anc ferm dal svilup da la pandemia – surtut l'unda da la varianta omicron dal coronavirus.
Tenor il KOF èn sa meglieradas las perspectivas surtut per il consum e prestaziuns da finanzas ed assicuranzas. Però era en la gastronomia vegn quintà cun svilups positivs. Però gist là po l'unda dad omicron avair gronda influenza e far in stritg tras las prognosas.
In zic main positiv è il svilup en ils secturs da prestaziuns da servetschs, l'industria elavuranta e la dumonda da l'exteriur. Entant ch'ils indicaturs ch'il KOF mesira per l'industria elavuranta (cumprais la branscha da construcziun) èn plitost sa sbassads, èn ils indicaturs per la situaziun cumpetitiva e per l'occupaziun tuttina creschids.