Svizra - Edelweiss stritga sgols a Scharm el-Scheich
Las societads aviaticas dal concern Lufthansa na sgolan ad interim betg pli a Scharm el-Scheich. A la Lufthansa appartegn era la societad Edelweiss. Anc avant paucas uras aveva lezza ditg ch’ins veglia sgular sco planisà a Scharm el-Scheich.
Vinavant sgolan la Lufthansa e sias societads affiliadas dentant en la chapitala egipziana Kairo.
Suenter ch’in aviun da passagiers russ era crudà sonda passada en l'Egipta avevan plirs pajais europeics decidì da stritgar ils sgols en la regiun da vacanzas Scharm el-Scheich, quai damai ch’ins na sa anc adina betg pertge che l’aviun è crudà.
