Legenda:
Adina puspè in tema:
Ina demonstraziun per l'egualitad da pajas il 2013 avant la Chasa federala a Berna.
Keystone
cuntegn
Svizra - Egualitad da paja tant pli spert
Medema paja per medema lavur – 25 onns suenter la chauma da las dunnas e 20 onns suenter che la lescha d'egualitad è ida en vigur pretenda l'Uniun sindicala svizra che quest principi vegnia finalmain realisà.
Da quella vegn tschantschà, sche dus emploiads da different sex u derivanza survegnan en il medem post ina paja differenta. Quai cun resguardar ch'els han la medema scolaziun, lavuran medem ditg sin la clamada e prestan usche circa il medem per l'interpresa.
L'Uniun sindicala svizra pretenda perquai controllas da paja. Sco quai che l'uniun sindicala scriva dettia anc adina fin 15% differenza tranter la paja da l'um e la paja da la dunna e quai per la medema lavur. Var la mesadad da quella differenza saja discriminaziun.
Lescha stoppia vegnir revedida
Ils meds actuals per cuntanscher l'egualitad da paja na tanschian betg tenor l'uniun sindicala. Per exempel stoppia vegnir pli simpel e renconuschì da far plogn en cass concrets. Tals plogns sajan anc adina ina ristga per la carriera. La lescha d'egualitad stoppia vegnir revedida e las controllas da la paja stoppian vegnir nudadas en la lescha, uschia l'uniun sindicala.
