Siglir tar il cuntegn

Header

cuntegn

Svizra Egualitad tar la scolaziun – inegualitad tar las pajas

En Svizra gudognan las dunnas anc adina pli pauc ch'ils umens, vitiers èn ellas sutrepreschentadas en uffizis politics. I dat però er progress pertutgant l'egualitad tranter um e dunna. Per exempel sajan dunnas giuvnas ozendi scoladas tuttina u meglier ch'ils umens giuvens.

Dunnas giuvnas èn ozendi scoladas tuttina bain u meglier che umens. Quai mussan cifras da l'Uffizi federal da statistica. Cumpareglià cun ils onns 1990 lavuran las dunnas ozendi adina pli savens. Il dumber da persunas – tar dunnas sco er tar umens – che lavuran parzialmain è creschì.

Quai che pertutga l'egualitad da las pajas e las funcziuns politicas è dentant da constatar ina stagnaziun u schizunt in regress dal svilup tar l'egualitad tranter um e dunna. Era la lavur da chasa n'è betg repartida egual.

Augment da la scolaziun sin stgalim terziar

Adina dapli dunnas giuvnas ed umens fan ina scolaziun sin stgalim terziar. Il 1999 avevan 9,8% da las dunnas tranter 25 e 34 onns finì ina scolaziun ad ina scol'auta, e 14,4% dals umens. L'onn 2018 avevan gia 42,3% da las dunnas e 34,7% dals umens finì ina tala scolaziun. Las dunnas elegian ozendi era pli savens direcziuns da studis, nua che umens eran pli baud en la maioritad sco per exempel en las scienzas natiralas, matematica e statistica, sco era inschigneria e construcziun.

RR novitads 10:00

Artitgels legids il pli savens