Sco ch'i tutga tar festivals da chors vegn chantà dapertut: En baselgias da Basilea, sin il Barfüsserplatz, ed igl ha dà concerts spontans cura ch'ils chors èn ids d'in lieu a l'auter.
Chors da l'entira Europa
Envidads eran mo chors che han fatg surstar ina giuria. Quels han lura survegnì in invit. Sper ils set chors da la Svizra èn stads da la partida: Belgia, Finlanda, Frantscha, Georgia, Irlanda, Israel, Lettonia, Lituania, Pologna, Serbia ed Ucraina. Vitiers in chor dad osp da las Filippinas.
En tut èn quai var 2'400 giuvenils che han chantà durant tschintg dis a 50 differents concerts. In da quests concerts aveva lieu venderdi suentermezdi, nua ch'il chor da giuvenils Grischun, il chor d'uffants da la Serbia ed il chor da giuvenils da l'Irlanda han chantà. La baselgia Clara a Basilea era cumplettamain plaina: las persunas sin ils banchins èn sesids stretg ed insaquantas persunas stevan davosvart en pe.
Martin Zimmermann – fundatur, manader e dirigent
Il manader dal chor da giuvenils Grischun ha fundà l'onn 2004 il chor, ensemen cun Andrea Accola. Dapi lura ha il chor gì in grond svilup e vala uss sco in dals megliers da l'entira Europa. Martin Zimmermann è schon stà a blers concerts e festivals cun il chor da giuvenils Grischun ed uschia ha el era bleras regurdanzas. Per exempel las occurrenzas en ils Stadis Unids,en Grezia, a Göteborg, a Vienna, en Belgia, a Bali u apunta il festival a Basilea. L'um da Schiers di, ch'el vul tegnair il nivel dal chor uschè aut sco ussa. Il pli impurtant è, ch'il chor fascinescha las persunas cun il chant.
