Siglir tar il cuntegn

Header

cuntegn

Elecziun en Turgovia Dominik Diezi è elegì – Center po salvar sez en regenza

En il chantun Turgovia è la regenza puspè cumpletta. Dominik Diezi da l'Allianza dal Center, ch'era il sulet candidat uffizial, è vegnì elegì cun 38'451 vuschs. Il president da la citad dad Arbon succeda cunquai a sia collega da partida Carmen Haag che sa retira sin la fin da matg.

Nagina concurrenza

Il giurist da 48 onns era sa mess en posiziun gia 5 dis suenter che Haag aveva annunzià ch'ella sa retriria. Ils Verds han lura bain annunzià ch'els hajan en sasez da bun in sez en la regenza, han dentant desistì d'ina candidatura. Els n'avevan betg quintà cun bunas schanzas encunter Diezi.

Er ils Verdliberals han desistì d'ina candidatura. Cun Ueli Fisch avessan els bain gì in candidat empermettend, damai ch'el aveva fatg gia il 2020 ed il 2016 avunda vuschs, era lura dentant crudà or perquai ch'i era memia bleras persunas elegidas.

Furmla magica resta, maioritad da dunnas betg

Il nov um en la regenza turgovaisa, Dominik Diezi tutga tar l'Allianza dal Center – la medema partida sco sia antecessura Carmen Haag. Uschia resta la furmla magica cun dus chaus da la PPS e mintgamai ina persuna da la PLD, la PS e l'Allianza dal Center.

Cun l'elecziun da Diezi è dentant a fin l'èra cun ina maioritad da dunnas en la regenza. Quella aveva regì dapi il 2015. La Turgovia è stà da quel temp pir il terz chantun, suenter Turitg e Vad che han gì dapli dunnas che umens en la regenza.

RTR novitads 15:00

Artitgels legids il pli savens

Scrollar a sanestra Scrollar a dretga