En il chantun Uri è la Partida populara svizra enavos en la regenza: Christian Arnold è vegnì elegì en l’emprim scrutini. En consequenza sto la Partida liberaldemocratica dar giu in da ses trais sezs en la regenza dal chantun Uri. In segund scrutini na dovri betg. Elegids èn ils tschintg d'enfin ussa: Urs Janett e Roger Nager da la PLD, Beat Jörg ed Urban Camenzind da la PCD e Dimitri Moretti da la PS. Da nov en la regenza èn Christian Arnold da la PPS e Daniel Furrer da la PCD.
Son Gagl – Tar emprim scrutini elegì 5 da 7 sez
Tar l'elecziun da renovaziun en il chantun Son Gagl ha la PPS medemamain la schanza da gudagnar in sez en la regenza che sa cumpona da set commembers. Quai dentant pir en il segund scrutini. Gia vegnids reelegids èn ils quatter commembers da la regenza da fin qua: Bruno Damann, Stefan Kölliker, Marc Mächler e Fredy Fässler. Plinavant ha er Susanne Hartmann cuntanschì la maioritad absoluta. La participaziun a las elecziuns era tar 34,43%, l'absolut pli era tar 53'945 vuschs.
RTR novitads 17:00