Siglir tar il cuntegn

Header

cuntegn

Elecziuns chantunalas In spustament a dretga

Il politolog e scienzà Michael Hermann ha valità las elecziuns per SRF. Tenor el sajan ils resultats in success per partidas a dretga: ils resultats mussian «in pulit cler spustament a dretga cun success per la PPS a Luzerna, Genevra e probablamain er en il Tessin.»

I saja er pussibel ch'i vegn anc ad ir dapli fin las elecziuns en l'atun. D'in effect da la crisa en connex cun la Credit Suisse n'ha Michael Hermann betg vesì insatge: La PS n'haja betg gì grond success e la PLD n'ha betg gì schlets resultats.

Lucerna

En il chantun da Lucerna è la regenza vegnida elegida da nov. En l’emprim scrutini èn ils dus cussegliers guvernativs d’enfin qua Fabian Peter da la PLD e Reto Wyss da l’AdC vegnids reelegids. Da nov en la regenza è Michaela Tschuor da l’AdC. Ella è l'emprima dunna en l'executiva lucernaisa dapi otg onns.

Armin Hartmann percunter n'ha per il nair da l'ungla betg cuntanschì il pli absolut en l’emprim scrutini. El vul defender il sez da la PPS. Ils dus sezs che restan uschia anc vacants vegnan occupads tar il segund scrutini da mez matg.

Genevra

Era il chantun da Genevra ha elegì la dumengia. Tar l’elecziun per la regenza n’ha nagin cuntanschì il pli absolut. Entant èn bunamain tut las vuschs dumbradas ora. Per tut ils set sezs datti damai in segund scrutini. Cleramain il nas oravant ha l’actuala directura da finanzas Nathalie Fontanet da la PLD.

Pierre Maudet, l’anteriur cusseglier guvernativ da la PLD, ch’era vegnì sclaus da la regenza da Genevra pervi da ses viadi da luxus ad Abu Dabi emprova ses comeback politic. Suenter l’emprim scrutini è el sin il sisavel plaz.

Tessin

En il chantun Tessin èsi gartegià a la cussegliera dals chantuns Marina Carobbio da far il sigl en la regenza. Ella defenda cun quai per la PS il sez dal cusseglier guvernativ Manuele Bertoli ch'è sa retratg.

Ils quatter cussegliers guvernativs d'enfin qua Norman Gobbi (Lega), Claudio Zali (Lega), Christian Vitta (PLD) e Raffaele De Rosa (AdC) èn vegnids reelegids senza problems.

RTR novitads 16:00

Artitgels legids il pli savens