En Glaruna ha la partida populara svizra gudagnà in segund sez en la regenza. En il segund scrutini ha la populaziun glarunaisa elegì Thomas Tschudi cun 5'167 vuschs. Quai èn mo 74 vuschs dapli che la concurrenta Daniela Bösch-Widmer da l'Allianza dal center. Uschia ha la PPS per l'emprima giada 2 sezs en la regenza chantunala glarunaisa – dapi che questa è vegnida reducida sin 5 commembers il 2006. Tschudi succeda al cusseglier guvernativ partent Benjamin Mühlemann dals Liberaldemocrats. La participaziun a las elecziuns è stada tar 39,7%.
Quai è l'emprima giada che la PPS ha puspè dus sezs en la regenza dapi che quella è vegnida reducida l’onn 2006 sin tschintg commembers. Sper ils dus sezs da la PPS, datti mintgamai in represchentant da la Partida liberaldemocrata, da l’Allianza dal Center sco era da la PS. La regenza è uschia ruschnada vinavant vers la dretga.
La Partida liberaldemocratica n'ha betg pudì defender en l'elecziun da cumbat il sez dal landamma partent Benjamin Mühlemann (PLD) cun lur candidat Roger Schneider. Represchentads en la regenza èn ils liberals anc cun Andrea Bettiga.