Christophe Darbellay ha ditg en vista als resultats da las elecziuns en ils chantuns, ch'i saja tuttavia pussaivel da gudagnar sezs cun mobilisar ils electurs. Quai malgrà che las retschertgas predian a la PCD perditas.
Ils 6 mais vegnints fin las elecziuns na vegnian betg ina spassegiada. Ins stoppia far cler als simpatisants ch’i sa tractia dad in’elecziun da destin.
Tenor Darbellay vul la PCD restar la partida ferma en il cussegl dals chantuns e mantegnair u schizunt meglierar la posiziun en il cussegl naziunal.
Critica envers autras partidas
Il president da partida crititgescha en ses pled d’avertura las autras partidas. En la politica dovria quai spertas decisiuns. Quellas vegnian dentant bloccadas dals dretgs e sanesters. En il visier da la critica eran oravant tut las diversas iniziativas da la PS.
Maioritad per diagnostica da preimplantaziun
Ina maioritad dals delegads da la PCD è s'exprimida per la diagnostica da preimplantaziun. A la radunanza da delegads a Brugg han ils Cristiandemocrats decidì la parola gea cun 120 cunter 83 vuschs. En las discussiuns precedentas eri sa mussà che la partida saja spartida en questa dumonda.
Cleramain gea ha la PCD ditg a la nova lescha da radio e televisiun, in cler na datti dentant per l'iniziativa da stipendis. Gia pli baud aveva la partida ditg na a l'iniziativa per ina taglia d'ierta.
RR novitads 14:00