Als socialdemocrats na gartegi uschia betg da defender il sez sanester en la regenza chantunala. Da nov ha la PCD-Allianza dal Center quatter sezs, ed uschia la maioritad en quella. Ils liberals han vinavant dus mandats, in sez occupa la partida populara.
Il resultat è cler
Moretti ha fatg 5’032 vuschs, las pli paucas dals trais candidats en il segund scrutini. Il politicher da 51 onns appartegneva dapi il 2016 a la regenza, e manava la direcziun da segirezza.
Recaltgà il sez da Moretti ha il cristiandemocrat Hermann Epp, cun far 6’082 vuschs. Il terz candidat dal segund scrutini, Georg Simmen da la PLD, è vegnì elegì cun 6’895 vuschs. Grazia a sia elecziun è la Val d’Ursera vinavant represchentada en la regenza chantunala.
Realisà l’elecziun gia en l’emprim scrutini avevan ils actuals cussegliers guvernativs Urs Janett (PLD), Christian Arnold (PPS), Urban Camenzind (PCD-AdC) e Daniel Furrer (PCD-AdC). Sco nova ha la cristiandemocrata Céline Huber cuntanschì l’elecziun gia en l’emprim scrutini.