Prest trais quarts dals parlamentaris che vulan puspè vegnir en il Cussegl naziunal ed en il Cussegl dals chantuns, na vulan betg declerar lur entradas. Quai mussa la glista da transparenza dal 2019 da l’organisaziun Lobbywatch.ch.
Mo 56 dals 198 cussegliers che vulan vegnir reelegids, èn suandads a la supplica da declerar las entradas ch'els survegnan da cussegls d'administraziun, uniuns ed autras organisaziuns. 131 parlamentaris han ignorà la dumonda ni han mo confirmà quai che Lobbywatch.ch ha chattà ora. 11 han almain per part inditgà questas entradas.
Las singulas partidas
Sco gia tar la glista da transparenza 2018, èn ils commembers da la Partida socialdemocratica ils pli transparents. 60% dals commembers da la fracziun han declerà lur entradas. Cun 50% èn ils Verds sin plaz 2. Las partidas burgaisas PCD e PLD sajan cun 17% lunsch enavos. Ed anc in zic pli reservada è tenor Lobbywatch.ch la Partida populara cun var 16%.
L’organisaziun Lobbywatch.ch sa basa sin funtaunas ch’èn accessiblas publicamain. Commembers èn schurnalistas e schurnalists da diversas chasas da medias.
RR novitads 18:00