Siglir tar il cuntegn

Header

Ils logos da Instagram, Twitter e Facebook.
Legenda: Facebook, Instagram e Twitter – pon politichers gudagnar las elecziuns cun social media? RTR Grafica
cuntegn

Cumbat electoral online «Social media porta mo insatge, sch'ins dovra endretg»

Pli svelt, pli flexibel e pli expressiv – il diever dals politichers sto dentant constar. Il cussegliader da politica, Mark Balsiger, explitgescha pertge che social media è schanza e sfida il medem mument.

Mark Balsiger vesa bain grond potenzial en il diever politic da social media. Plirs facturs èn clers indizis per il diever da Facebook, Instagram u Twitter:

  • Ins po lantschar ina discussiun cura ch'ins vul: Social media ston ins metter avant sco ina maisa radunda virtuala. La differenza tar ina maisa radunda en ina ustaria è ch'ins na prenda betg plaz in temp fix. Ins po cumenzar a discurrer davart in tema cura ch'ins vul, e quai davent da chasa. En il cas optimal chaschuna quai reacziuns ed i dat ina discussiun sin in dals chanals da social media.

Tge chanal è il pli adattà?

Personen-Box aufklappenPersonen-Box zuklappen

Tenor Mark Balsiger è Facebook il chanal il pli adattà. Quai saja uschia gia dapi intgins onns: 4 milliuns Svizzers e Svizras èn cun ina tscherta regularitad activs e quai schegea ch'igl ha dà bain inqual scandal ils davos onns. Instagram, che para da vegnir pli e pli en moda, na vegn (anc) betg nizzegià uschè politic. Ultra da quai èn dals 2.5 milliuns profils en Svizra era blers profils «fake» (n'appartegnan betg ad ina persuna reala).

  • Ins po survegnir cifras exactas: En cumparegliaziun cun in inserat politic en ina gasetta dal di u in placat da partida vid ina paraid pon ins tar in post da reclama sin social media (video, fotografia, text etc.) survegnir cifras dals recepturs: Con bleras persunas han cliccà sin la reclama? Quantas persunas han guardà il video? etc. Questas cifras dattan in meglier punct da referiment, co las reacziuns dals recepturs èn stadas.
  • Ins po regular pli flexibel las finanzas: Ins po investir quant bler daners ch'ins vul sin social media. Per mintga post ch'ins fa èsi pussaivel da regular danovamain quant bler ch'ins vul investir. La regulaziun fina è il punct revoluziunar. Quai n'è fin uss betg stà pussaivel cun placats, inserats etc. En general èsi uschia: Pli blers daners ch'ins investescha e pli gronda è la derasaziun dal cuntegn.

Cumbat electoral online n'è betg gratuit

Personen-Box aufklappenPersonen-Box zuklappen

Tge ch'è impurtant da vesair: ch'era in cumbat electoral sin social media n'è betg gratuit – u almain betg sch'el duess purtar success. Sch'ins na paja betg per in post (text, video, maletg etc.) sche cuntanschan ins sulettamain in pitschen radius da profils (sche insumma tut ils agens «amis virtuals»). La realitad demussa gia dapi daditg che quai na tanscha dentant betg.

... dentant sch'ins na sa betg co duvrar, na porti nagut

Mark Balsiger accentuescha ch'ils chanals da social media portan mo insatge, sch'ins chapescha co els funcziuneschan, ergo:

  • Sur in lung temp sto in politicher nutrir ils chanals cun bun cuntegn per ch'el haja la fin finala era insatge da quai.
  • Dentant era betg memia bler – suenter ina tscherta summa da posts po la reclama politica sin social media era esser cuntraproductiva, e far vegnir unfisas las votantas ed ils votants.
Per politichers che han retegnientschas, na fan betg gugent quai u na san betg s'exprimer bain en furma scritta èsi meglier, sch'i laschan star ils chanals da social media.
Autur: Mark Balsigercussegliader da politica

En il Grischun desistan era blers dals politichers d'esser activs sin las medias socialas. Uschia na possedan per exempel ils dus exponents enconuschents Magdalena Martullo-Blocher (PPS) e Martin Schmid (PLD) nagins profils sin social media. Percunter èn Martin Candinas (PCD) e Jon Pult (PS) fitg activs.

Cunquai ch'il barat sin via en il Grischun è dentant anc bler pli grond ch'en regiuns urbanas, manegia Mark Balsiger ch'i na saja betg ina cundiziun necessaria d'esser activ sin Facebook, Instagram e Twitter per recaltgar in sez en il parlament naziunal.

Video
Cumbat electoral sin social media – u betg
Or da Telesguard dals 30.08.2019.
laschar ir

RR actualitad 07:00