Siglir tar il cuntegn

Header

cuntegn

Cun il pop en scola Coordinar lavur e famiglia – gia avant 40 onns ina sfida

Mariachatrina Gisep Hofmann ha quasi l'entira vita lavurà, er cura ch'ella è vegnida mamma. Gia cura che l'emprim uffant è vegnì sin il mund l'onn 1980, ha ella duvrà creativitad per coordinar famiglia e lavur.

Mariachatrina Gisep Hofmann

Personen-Box aufklappenPersonen-Box zuklappen

Ella è creschida si en la Val Müstair. Il gimnasi ha ella dentant gia fatg giu la Bassa, en il chantun Argovia. Suenter il studi ed emprimas experientschas sco magistra en il chantun Turitg è ella arrivada l'onn 1979 si Samedan.

A Samedan vuleva ella atgnamain dar scola en las classas secundaras. Cun quai ch'ella ha fatg ils studis a Turitg e betg a Cuira n'ha ella dentant betg survegnì quel post. Ella ha dentant pudì lavurar en la scola media. Là ha ella dà scola a differentas classas – dal 10avel onn fin al preseminari.

L'onn 1983 è ella cun tut la famiglia ida a star en l'Africa. Pir l'onn 1987 è ella turnada en Svizra, questa giada a Ftan ed a Scuol.

Oz è ella pensiunada, dentant betg pli pauc passiva. Ella lavura per part sco guida da turists sin bastiments cruschaders.

Cur che l'emprim uffant è naschì èsi per la magistra, uriunda da la Val Müstair, stà cler: Ella lavura vinavant.

Jau aveva investì bler temp, bler'energia e blers raps per far mes studi e na vuleva betg star a chasa.
Autur: Mariachatrina Gisep HofmannMagistra pensiunada

L'um dad ella ha lavurà 100% ed era bler davent. Coordinar sia lavur a la scola media da Samedan e la famiglia – betg ina simpla incumbensa. Per l'emprim uffant ha Mariachatrina Gisep Hofmann chattà ina mamma dal di. Quella aveva sezza dus uffants. Sche l'uffant da la magistra na steva betg bain, na vuleva la mamma dal di dentant betg avair el en chasa. Mariachatrina Gisep Hofmann ha lura prendì cun ella l'uffant en scola.

Creativitad en stanza da scola

Ils scolars en la scola media a Samedan han gì encletga per lur magistra. Per il cas ch'ella aveva da tezzar ses figl, è ella ida en ina stanza da preparaziun. Ils scolars han lura survegnì fegls da lavur. Sco pitschen extra:

Ils scolars han gì plaschair – ils cussegls da scola dentant betg. Adina puspè hai tar ella gì num en in tun critic: «E tge capita cun ils uffants?».

Charta a la regenza

L'onn 1980, cura che l'emprim uffant dad ella è naschì, na devi en Grischun anc nagin congedi da maternitad. En auters chantuns era quai auter. La magistra avess era giavischà quel congedi. Quai ha ella scrit en ina charta al cusseglier guvernativ ch'era responsabel per la scolaziun. La resposta dad el:

El ha scrit enavos a mai, che jau sco pedagoga stoppia bain savair quant impurtant ch'i saja che la mamma stat a chasa e ch'el saja cunter quai.
Autur: Mariachatrina Gisep Hofmannmagistra pensiunada

Ina resposta ch'ha schoccà ella. Pli tard haja ella puspè scrit in per chartas – questa giada a tut las deputadas en il parlament, da quel temp 3. Effect da las chartas u betg: L'onn 1987, cura ch'il terz ed ultim uffant da Mariachatrina Gisep Hofmann è naschì, han ins survegnì 6 emnas congedi da maternitad.

RR actualitad 08:00