Na, la populaziun na po betg eleger directamain il Cussegl federal, quai fa il parlament a Berna. E tuttina ha l'institut Sotomo laschà giuditgar la populaziun la regenza svizra.
Berset resta a la testa
Alain Berset (PS) vala cun gronda maioritad sco cusseglier federal cun la pli gronda influenza. El valiva gia avant la pandemia sco cusseglier cun blera influenza, sco minister da sanadad è quella creschida fermamain ed er suenter la crisa da corona ha el mantegnì sia posiziun.
Silsuenter suondan il minister da finanzas Ueli Maurer (PPS), la ministra da giustia Karin Keller-Sutter (PLD), la ministra d'energia e d'ambient Simonetta Sommaruga (PS) e la ministra da defensiun Viola Amherd (AdC).
La pli pauca influenza tenor la retschertga han il minister d'economia Guy Parmelin (PPS) ed il minister da l'exteriur Ignazio Cassis (PLD) – e quai malgrà lur onns presidials. Guy Parmelin ha pudì augmentar sia influenza durant l'onn 2021, cura ch'el è stà president da la Confederaziun. Uss ha el dentant puspè pers quella. Ignazio Cassis na para betg da pudair profitar da l'attenziun sco president da la Confederaziun actual: El ha pudì augmentar sia influenza be sin 8%.
Amherd vala sco simpatica
En la categoria da simpatia ha la ministra da defensiun Viola Amherd persvas la maioritad da las persunas dumandadas. Alain Berset percunter para da polarisar: Er sch'el è pli simpatic che Amherd per blera glieud, è el era asimpatic a pli bleras persunas dumandadas.
La pli pauca simpatia giauda Ignazio Cassis. La cumpart da persunas che na chattan el insumma betg simpatic è bain circa tuttina gronda sco tar Ueli Maurer – lez percunter survegn dapli simpatia.
Cumpareglià cun ils ultims onns han sulettamain Ueli Maurer ed Ignazio Cassis pudì augmentar lur simpatias – tut tschels han pers simpatia.
Remartga: Durant l’enquista ha Ueli Maurer annunzià sia demissiun sco cusseglier federal.
