La Confederaziun ha publitgà dumengia cifras faussas da la fermezza da las partidas, tar las elecziuns dal Cussegl naziunal. Quai ha l'Uffizi federal da statistica constatà tar controllas da qualitad. La correctura n'ha naginas consequenzas per la repartiziun dals mandats, e per las cusseglieras naziunalas ed ils cussegliers naziunals elegids.
Tenor las cifras curregidas resta la PLD però la terz ferma forza politica en il pajais. Ses resultat è bain vegnì curregì engiu per 0,13 puncts procentuals sin 14,3%. Perquai che la fermezza da l'Allianza dal Center è però vegnida inditgada dumengia perfin per 0,52 puncts procentuals memia auta, croda ella davos ils liberals. Tenor las cifras curregidas vegn l'Allianza dal Center sin ina quota d'electurs da 14,1%.
La pli gronda è la differenza tar la PPS. Ella vegn uss sin ina quota d'electurs da 27,9% – enstagl da 28,6% sco inditgà la dumengia. La PS vegn sin 18,3% – enstagl da 18,0% sco inditgà.