Siglir tar il cuntegn

Header

cuntegn

Cussegl naziunal Verds cun victoria istorica

L'unda verda sa mussa er en la repartiziun per ils sezs en il Cussegl naziunal: La Partida verda gudogna 17 sezs e vegn sin total 28. Ella è cunquai pli ferma che la Partida cristiandemocratica (PCD). La gronda perdidra è la PPS - era sch'ella resta la pli gronda fracziun.

Che la Partida verda gudognia la vuschs è vegnÌ spetgà, cunquai che la discussiun enturn il clima è stà il tema dominant en il cumbat electoral. Ina victoria uschè clera è dentant ina surpraisa: Cun gudagnar 17 sezs en ina elecziun, rumpan ils Verds in record da la PPS: Lezza era fin uss la partida che ha gudagnà il 1999 ils pli blers sezs novs – numnadamain 15.

Uss fa la Partida verda era pretensius: Ella vul in sez en il Cussegl federal.

Ils verd-liberals gudognan era 9 sezs e vegnan sin total 16. Persuenter perda la Partida socialdemocratica quatter sezs.

Cussegl naziunal resta burgais

La PPS è vinavant la pli ferma partida en Svizra - era sch'ella perda cun 12 mandats il pli ferm. La Partida liberala perda 4 sezs e la Partida cristiandemocratica perda 2 sezs.

La Partida burgaisdemocratica n'ha betg pli fermezza da fracziun en il Cussegl naziunal: Anc 3 persunas represchentan la PBD - in minus da 4 sezs.

Ils Verds surpassan la PCD

La fermezza da partidas mussa: La Partida verda è da nov sin plazza quatter cun 13,2% ed uschia pli ferma che la PCD (11,4%).

Pli paucs èn ids ad eleger

A las elecziuns dal Cussegl naziunal èn sa participadas 3,4% pli paucas persunas ch'il 2015 - en tut 45,1%. Quai annunzia l'Uffizi federal da statistica. La participaziun variescha dentant fitg da chantun a chantun: La pli auta valur noda tradiziunalmain il chantun Schaffusa (59,7%), nua ch'i dat in obligatori da votar. Las pli paucas persunas èn idas a Genevra a l'urna (38,2%).

RTR Elecziuns 2019