Siglir tar il cuntegn

Header

cuntegn

Duo 3 sin via: Favre & Gasser «Spanegià co che la famiglia chatta l'equiliber»

Fertant che Valérie Favre Accola è gnervusa avant l'inscunter cun la famiglia Kaufmann a Cuira è Josias Gasser calm. Omadus candidats èn dentant spanegiads co che la famiglia metta sut in chapè, famiglia e carriera.

Seser vi d'ina maisa e discussiunar davart in problem dal mintgadi, quai saja la politica ch'els fetschian gugent. Quai din Valérie Favre Accola da la PPS e Josias Gasser da la Partida verd-liberala. Els sajan er spanegiads co che Flurina e Simon Kaufmann, che lavuran omadus, mettan sut in chapè lur professiuns e la famiglia.

Ils dus candidats enconuschan la tematica da la cumpatibilitad da carriera e famiglia da duas differentas perspectivas. Valérie Favre Accola ha adina lavurà cun avair trais uffants. Josias Gasser percunter n'ha betg famiglia, ma el enconuscha il tema ord vista dal patrun. Omadus accentueschan ch'i na dettia betg la soluziun en chaussa, mintga pèrin haja auters giavischs e perquai dovria bunas cundiziuns per soluziuns individualas.

5 dumondas a Valérie Favre Accola

Personen-Box aufklappenPersonen-Box zuklappen

Subvenziunar canortas – è quai ina pussaivladad da tegnair dapli dunnas en il process da lavur?

Gea e na, i dovra dapli che subvenziuns per canortas. I dovra flexibilitad e cunvegnas tranter ils pèrins. Plinavant dovri er flexibilitad da patruns ed emploiads, p. ex. en connex cun il temp da lavur ubain er cun ils models da lavur (home office). Plinavant ston ins esser conscient che canortas na fan betg be naufragi pervia da finanzas, mabain er pervia da vischins (canera) e la birocrazia. Educaturas ed educaturs d’uffants pitschens han bleras sfidas – er qua dovri lavur.

Dunnas en l’etascha da schefs – tge fan ellas auter ch’ils umens?

Cuntradumonda, fan las dunnas propi insatge auter u portan ellas simplamain anc in'ulteriura vista custaivla en la fatschenta, quai er sin fundament da lur experientschas? Jau percepesch dunnas sco analiticas, reflectadas, strategicas, creativas ed avertas per novas soluziuns. Uschia èn ellas forzas innovativas.

Cura en voss mintgadi percurschais Vus inegualitad da schanzas tranter um e dunna?

Jau persunalmain hai gì la fortuna d’avair las medemas schanzas. Igl esser mamma è per mai in privilegi, il qual mes um n’ha betg pudì viver tuttina. Per quai sun jau dentant er stada pronta da far midadas en mia professiun. Jau hai dà giu mia plazza da management d’in institut universitar per savair ir in’autra via professiunala. Quai è stà ina decisiun persunala.

Vus avais cumbinà famiglia e professiun – avais Vus magari gì nauscha conscienza envers la famiglia?

Na, cunquai ch’jau n'enconuscheva nagut auter. En mia famiglia èn ins adina stà avisà sin ina segunda paja, tut las dunnas han perquai lavurà. Jau sun era adina stada loscha da mia mamma che gieva a lavurar. La famiglia ha dentant adina gì auta prioritad, perquai prend jau oz er resguard sin mia famiglia e ses basegns. Uschia constatti per nus tuts.

Tgi è en Vossa famiglia stà responsabel per l’educaziun?

En ils emprims onns d’uffanza sun jau cleramain stada la responsabla, cunquai che mes um era sco skiunz da professiun emnas a la lunga da viadi. En quel temp hai jau de facto educà ils uffants sezza. Pli tard ha mes um giugà ina ina rolla pli impurtanta en l’educaziun.

5 dumondas a Josias Gasser

Personen-Box aufklappenPersonen-Box zuklappen

Subvenziunar canortas – è quai ina pussaivladad da tegnair dapli dunnas en il process da lavur?

Gea, igl è ina pussaivladad en cas ch’i fa da basegn.

Dunnas en l’etascha da schefs – tge fan ellas auter ch’ils umens?

Dunnas decidan auter. Ina buna maschaida da dunnas ed umens maina tar meglras decisiuns.

Cura en Voss mintgadi percurschais Vus inegualitad da schanzas tranter um e dunna?

Al telefon, en chaussa pajas, en cuntanscher posiziuns da manar.

Avais Vus ina dunna che Vus admirais per sias prestaziuns?

Dr. Monika Krüsi, la presidenta dal cussegl d’administraziun da la Repower.

Tgi è en Vossa famiglia stà responsabel per l’educaziun?

Cunzunt la mamma. Il bab ha era gidà, quai en ses temp liber ch’era fitg limità.

Il project da RTR «Ti ed jau faschain politica»

Il project da RTR «Ti ed jau faschain politica»

Persunas sco ti ed jau envidan candidatas e candidats per il Cussegl naziunal ad ina baterlada. Enturn maisa raquintan els dad ina sfida che fatschenta els en lur mintgadi. Quels 5 inscunters emetta RTR durant 5 mesemnas:

  • 04-09 Ovras socialas tar Ruodi Duschletta, Sent
  • 11-09 Sanadad tar Sandra ed Andri Baltermia, Salouf
  • 18-09 Economia tar Flurina e Simon Kaufmann-Henkel, Cuira
  • 25-09 Clima tar ina classa da la scola media, Glion
  • 02-10 Diaspora tar Peter Vesti e Petra Camathias, Turitg

Tar mintga tema dain era in sguard en l'istorgia, preschentain cifras e fatgs e numnain las sfidas actualas.

Las elecziuns naziunalas èn ils 20 d'october 2019.

RR actualitad 07:00