Siglir tar il cuntegn

Header

cuntegn

Duo 4: Stiffler & Brand «Las pussaivladads da discutar cun giuventetgna èn raras»

Vera Stiffler è in zic gnervusa avant l'inscunter cun la classa a Glion. Nagins segns da gnervusitad tar Heinz Brand. Omadus candidats san dentant, ch'igl è insatge auter da discutar cun la giuventetgna che cun auters politichers, spezialmain sch'i va per il clima.

A Berna en il Cussegl naziunal haja el adina da discurrer cun profis ch'èn lavads cun tut las auas, di Heinz Brand (PPS). Perquai sa legra el sin in discurs in zic pli luc cun las scolaras e scolars da la scola mercantila (HMS) e da la scola media spezialisada (FMS) a Glion.

Tenor Vera Stiffler (PLD) èsi grev da giuditgar tge discurs ch'i dettia cun la giuventetgna. Quai saja dentant insatge che plaschia ad ella, quai fetschia interessant e spontan la discussiun.

Sco preparaziun per la discussiun saja ella sa fatschentada cun la situaziun dals scolars e da las scolaras l'onn 2050. Uss elavurian e discussiunian els finamiras en vista al temp, cura ch'ils giuvens e giuvnas da la classa da Glion sajan sezs creschids, lavurian ed hajan famiglia. Gist perquai saja l'inscunter er fitg interessant.

Stiffler e Brand èn spanegiads sin las dumondas da la giuventetgna

Il clima e l'ambient è in tema che muventa la giuventetgna. Perquai èn ils dus politichers spanegiads sin la discussiun.

Jau spetg era magari ina dumonda in zic pli frecha.
Autur: Vera Stifflercandidata per il Cussegl naziunal

Per Heinz Brand èsi impurtant dad esser fitg autentic durant il discurs. Scolaras e scolars percorschian spert, sch'ins na saja betg sasez ed emprovia da raquintar ad els insatge a moda aritfiziala . Oravant tut tar in tema actual sco la midada dal clima.

Nossas posiziuns n'èn betg uschè extrem differentas.
Autur: Heinz Brandcusseglier naziunal

El veglia cunzunt discutar cun ils scolars e las scolaras la moda e maniera da viver dad in e scadin. Là possia mintgina e mintgin influenzar las consequenzas da l'agen sa cuntegnair er per l'ambient.

Il project da RTR «Ti ed jau faschain politica»

Il project da RTR «Ti ed jau faschain politica»

Persunas sco ti ed jau envidan candidatas e candidats per il Cussegl naziunal ad ina baterlada. Enturn maisa raquintan els dad ina sfida che fatschenta els en lur mintgadi. Quels 5 inscunters emetta RTR durant 5 mesemnas:

  • 04-09 Ovras socialas tar Ruodi Duschletta, Sent
  • 11-09 Sanadad tar Sandra ed Andri Baltermia, Salouf
  • 18-09 Economia tar Flurina e Simon Kaufmann-Henkel, Cuira
  • 25-09 Clima tar ina classa da la scola media, Glion
  • 02-10 Diaspora tar Peter Vesti e Petra Camathias, Turitg

Tar mintga tema dain era in sguard en l'istorgia, preschentain cifras e fatgs e numnain las sfidas actualas.

Las elecziuns naziunalas èn ils 20 d'october 2019.

RR actualitad 07:00