Ils 22 d'october vegn elegì en Svizra in nov parlament. Var dus mais avant las elecziuns publitgescha la SRG SSR il terz barometer da l'onn 2023. Il barometer mussa las intenziuns d'eleger da las votantas ed ils votants.
Verds perdan, PPS gudogna
La pli ferma partida resta la Partida populara svizra. Tenor la retschertga actuala elegia mintga quart Svizzer e Svizra la partida. Cumpareglià cun las elecziuns dal Cussegl naziunal da 2019 èn quai 2 puncts procentuals dapli, en tut vegn la PPS uss sin 27,6%. La partida la pli ferma è uschia era quella cun il pli grond augment da vuschs.
Il pli bia sustegn perda la Partida verda, 2,5 puncts procentuals dal 2019. Vi da lur posiziun na mida quai dentant nagut, els restan la tschintgavel ferma partida.
Egualitad tranter PLD ed AdC
Pli interessanta sa mussa la situaziun sin plazza trais e quatter. L'Allianza dal Center e la Partida liberaldemocratica vegnan tenor la retschertga omaduas sin bunamain 15%. Pervi da la quota da sbagl da la retschertga na pon ins betg dir tgenina partida ch'è actualmain la terz pli ferma. Quai è dentant ina impurtanta dumonda sch'ins resguarda che las trais pli fermas partidas han tradiziunalmain mintgamai dus sezs en il Cussegl federal.
Premias da las cassas da malsauns sco pli gronda sfida
Al cumenzament da l'onn eran las premias da las cassas da malsauns anc sin plazza trais da las sfidas politicas. Uss dian 39% dals Svizzers e las Svizras che quai saja ina da las trais pli grondas sfidas politicas da noss pajais. Uschia sa chatta la tematica per l'emprima giada da la perioda da legislatura sin l'emprim plaz.
Las premias da las cassas da malsauns stauschan uschia la midada dal clima sin plazza dus, 37% da la populaziun han inditgà quella sco sfida la pli gronda. Avant dus onns eran quai anc 44%. Per la decisiun a l'urna resta la tematica dentant la pli impurtanta, 25% dals votants e votantas han inditgà da sa decider per ina partida pervi da la tematica dal clima.
Sco terz pli impurtanta sfida è l'immigraziun che fatschenta 33% da la populaziun. La tematica è pli impurtanta ch'anc avant dus onns. Lura vesevan be 20% l'immigraziun sco impurtanta sfida politica.
