Siglir tar il cuntegn

Header

audio
Mezdi: Analisa da las elecziuns da Adrian Camartin, correspundent Chasa federala
Or da Actualitad dals 11.12.2019.
laschar ir. Durada: 03:54 minutas.
cuntegn

Elecziun Cussegl federal Naginas surpraisas

L'Assamblea federala ha reelegì cleramain ils commembers e las commembras dal Cussegl federal d'enfin uss. L'attatga dals verds cun Regula Rytz n'ha gì nagina schanza. Simonetta Sommaruga è nova presidenta da la Confederaziun.

Regula Rytz ha survegnì 82 vuschs tar la reelecziun da Ignazio Cassis. Lez ha survegnì 145 vuschs ed ha uschia pudì defender ses sez en la regenza svizra. Sche Rytz ha era survegnì vuschs dals verd-liberals, sco quai ch'igl era vegnì annunzià, n'han probabel betg tuts socialdemorats votà per la presidenta dals Verds. Pertge la Partida socialdemocratica e la Partida verda han ensemen 83 vuschs.

Er la segunda represchentanta da la PLD en il Cussegl federal, Karin Keller-Sutter n'ha betg gì in bun resultat. Ella ha fatg cun 169 vuschs il segund mender resultat. Las pli bleras vuschs ha retschavì la scheffa dal Departament federal da defensiun, protecziun da la populaziun e sport Viola Amherd. Era sur 200 vuschs hai dà per Alain Berset ed Ueli Maurer.

Survista dals resultats


Vuschs retschavidas
Cedels valaivels
Ueli Maurer (PPS)
213
221
Simonetta Sommaruga (PS)
192218
Alain Berset (PS)
214230
Guy Parmelin (PPS)
191204
Ignazio Cassis (PLD)
145
238
Viola Amherd (PCD)
218
232
Karin Keller-Sutter (PLD)
169
206

Nagin sez per ils verds

La verda Regula Rytz ha reagì cun ina tenuta cumbattanta sin sia terrada. La partida verda saja e restia pronta da surpigliar responsabladad, ha ella ditg. La rolla dals verds restia er il futur la medema: bajegiar punts ed elavurar ensemen cun ils auters refurmas:

Nus vegnin a collavurar vinavant constructiv – deplorablamain en la opposiziun e betg en la regenza.
Autur: Regula Rytz

Il schef da fracziun dals verds, Balthasar Glättli n'è betg surprais ch'i n'è betg gartegià a sia partida da survegnir in sez en il Cussegl federal. Per el èsi cler ch'ils verds ston uss adina ponderar la strategia cura ch'in sez en il Cussegl federal è puspè vacant.

La proxima schanza sin in sez en il Cussegl federal han ils verds sch'ina cussegliera u in cusseglier federal sa retira anticipadamain u il pli tard en quatter onns.

Spetgas e pretensiuns dals parlamentaris grischuns

Jon Pult (PS) avess gugent vis Regula Rytz en il Cussegl federal. Per el ina schanza manchentada da far ina midada suenter l'unda verda en il parlament. Magdalena Martullo-Blocher è leda ch'i n'ha dà nagina midada en il Cussegl federal. Uschia hajan ins mantegnì la stabilitad e concordanza en la regenza.

Discussiun davart «furmla magica» resta

Il cusseglier dals chantuns da la PCD, Stefan Engler di ch'i saja da discutar davart la represchentaziun da las partidas en il Cussegl federal. Quai ha er il president da la PCD Gerhard Pfister ditg, ch'ha gia envidà las ulteriuras partidas per in inscunter en chaussa. Per part è er la PLD pertscherta ch'in da lur sezs en il Cussegl federal ballucca. Tenor cussegliera naziunala Anna Giacometti dessi er la pussaivladad d'engrondir il Cussegl federal.

Sommaruga è nova presidenta

Cussegliera federala Simonetta Sommaruga è vegnida elegida sco nova presidenta da la Confederaziun, quai gia per la segunda giada en sia carriera. La politicra da la PS ha fatg 186 vuschs.

Igl è l'otgavla giada ch'ina dunna presidiescha la Confederaziun. Sommaruga vegn uschia a manar las sesidas dal Cussegl federal durant in onn. Dapi l'entschatta da l'onn timunescha ella il Departament federal d'ambient, traffic, energia e communicaziun UVEK.

RTR actualitad 12:00

Artitgels legids il pli savens

Ir a sanester Ir a dretg