Siglir tar il cuntegn

Header

cuntegn

Elecziuns 2019 La Partida liberaldemocratica

Ils emprims onns ch'igl ha dà la Confederaziun han ils liberals occupà tut ils sezs grischuns en il Cussegl naziunal. Tar las ultimas duas elecziuns naziunalas n'hai dentant gnanc pli tanschì per in sez en la Chombra gronda, persuenter per in en la Chombra pitschna.

La PLD stat per ina societad liberala ed ina economia ferma. Ils liberals dal Grischun han dapi che la Confederaziun exista adina gì almain in um – anc mai ina dunna – en la Chombra gronda a Berna – fin il 2011. Quel onn n'èsi betg gartegià a Tarzisius Caviezel da defender ses sez en il Cussegl naziunal.

La sperdita è stada dolurusa per la PLD dal Grischun. Tant pli, sch'ins sa che la partida ha occupà ils emprims decennis da la Confederaziun tut ils sezs ch'il Grischun aveva dabun. Pir cura ch'il proporz è vegnì introducì avant tschient onns, han ils liberals gì l'emprim be trais, lura be dus e suenter in per decennis be in cusseglier naziunal – e dapi duas legislaturas nagin sez pli en la Chombra gronda.

Gartegia a la PLD da conquistar enavos il sez?

La PLD grischuna va cun quatter glistas e 20 candidats en il cumbat electoral – ina da quellas è ina giuvna. Questas dimensiuns pon far la parita che la PLD è malsegira da ses agens candidats e candidatas. I saja però stà ina decisiun da strategia, manegia Bruno Claus en il discurs cun RTR:

Tar las ultimas elecziuns han be paucas vuschs mancà a nus. Sinaquai avain nus analisà tut e decis da midar la strategia: Dapli glistas duain cuvrir meglier l'entir chantun.
Autur: Bruno Clauspresident PLD GR

I croda en egl che la partida sa fida vinavant sin la tradiziun masculina – dasper 15 umens chattan ins be 5 dunnas sin las glistas. Quai correspunda ad ina quota da 25%.

Cumpareglià cun noss concurrents essan nus en ina buna posiziun cun tschintg dunnas.
Autur: Bruno Clauspresident PLD GR

Sch'ins cumpareglia però la quota da dunnas sin las glistas, pon ins constatar che tuttas partidas – cun excepziun da la PPS – han ina pli auta quota da dunnas. La top-candidata da la PLD, Vera Stiffler, è sin il segund plaz da la glista principala.

Clau Dermont: «La PLD turna franc enavos a Berna»

La Partida liberaldemocratica haja fitg bunas schanzas da survegnir enavos il sez en il Cussegl naziunal, di il politolog Clau Dermont. Cun agid da la Partida burgais-democratica e da la Partida cristiandemocratica – cun quellas duas partidas furma la PLD ina colliaziun da glistas – pudess quai esser bain pussaivel.

Il politolog vesa las pli bunas schanzas per Michael Pfäffli. Dentant era Anna Giacometti s’haja fatg in num en il Grischun. Tras la catastrofa cun la bova a Bondo han Grischunas e Grischuns emprais ad enconuscher la dunna da la Bregaglia. Ella haja pudì mussar, ch'ella possia ir enturn cun catastrofas ed ella pudess profitar dal moviment da las dunnas, finescha il politolog Clau Dermont.

Cun Martin Schmid en la Chombra pitschna

Avant otg onns ha la PLD bain pers il sez en il Cussegl naziunal, persuenter conquistà cun Martin Schmid in sez en il Cussegl dals chantuns. En la Chombra pitschna avevan ils liberals grischuns avant stuì dar durant 70 onns la precedenza a la PCD ed a la PPS. Martin Schmid candidescha er quest onn anc ina giada per il Cussegl dals chantuns.

RTR elecziuns 2019