Siglir tar il cuntegn

Header

cuntegn

Elecziuns 2019 La Partida populara

«Socialists mascrads» u «partida dad ateists» han ins numnà els l’entschatta. I sa tracta da la Partida dals democrats ch’è sa furmada avant tschient onns. Oz na pon ins strusch s’imaginar ch’ins titulass uschia la Partida populara svizra – la PPS.

Ma ils democrats èn ils antenats da la PPS. Quai mussa che la Partida populara ha prendì inqual storta e fatg atras pliras vieutas. Ed era puncto dumber da mandats en las duas chombras federalas èsi ì ina giada ensi e lura puspè engiu.

Mantegnair dus mandats

Tant Heinz Brand sco er Magdalena Martullo-Blocher vulan turnar sin lur sezs en il Cussegl naziunal. Per che quai gartegia sco la PPS batter cunter duas allianzas: la colliaziun da glistas dal center e la colliaziun verd-cotschna. Quai n'è nagut da nov. Dapi ch’ils democrats (la partida antecessura da la PPS) fa politica, hai adina dà svaris: Per temps occupava la partida in sez, lura plirs onns dus ed in temp perfin trais sezs. Sulet en la legislatura che Eveline Widmer-Schlumpf è vegnida elegida en il Cussegl federal e la PPS svizra ha bittà ora la secziun grischuna, ha la PPS grischuna gì nagins mandats en il Cussegl naziunal.

En il Cussegl dals chantuns ha la PPS er adina gì in sez fin che Christoffel Brändli ha chalà avant otg onns e la partida ha stuì surlaschar il sez als liberaldemocrats cun Martin Schmid. Uss è Christoffel Brändli sesì sin la sutga chauda ed ha respundì a dumondas davart il cumbat electoral da la PPS.

Discutar dals problems svizzers e na dals verms.
Autur: Christoffel Brändli

La campagna cun il mail plain verms ha fatg lingias grassas: Plirs verms da colurs d'autras partidas sa foran tras in mail cotschen. A Christoffel Brändli na para questa campagna betg d'esser la dretga via. Cun talas campagnas veglia la PPS dentant provocar discussiuns surda problems centrals da la Svizra. La finala saja la PPS la suletta partida che saja cunter «quell'immigraziun extrema» e l'unica partida che battia cunter l'integraziun a l'Euorpa.

Oriundamain piuniera per dunnas

La PPS ha tramess l’emprima dunna grischuna en il Cussegl naziunal numnadamain Elisabeth Lardelli. Da quella rolla da piunier na sentan ins sin las tschintg glistas actualas betg pli la massa: Dals 25 candidats èn 6 dunnas.

«Mobilisar, mobilisar e mobilisar»

La PPS è la pli gronda partida en Svizra, dentant perda quella tenor il barometer d’elecziun ils pli blers puncts procentuals, numnadamain 2,6. Quai ch'il barometer mussa, conferma er il politolog Clau Dermont: a la partida mancan ils temas. Per exempel è la migraziun ida enavos e n'è betg pli uschè actuala sco tar las elecziuns dal 2015.

La basa saja gronda tar la PPS. Quella stoppian ins uss mobilisar sin livel naziunal sco era chantunal, di il politolog. Uschiglio è in dals dus sezs che la partida ha en il Cussegl naziunal en privel. Clau Dermont prevesa che la glista da Heinz Brand vegn a far dapli vuschs che quella da Magdalena Martullo-Blocher.

La raschun è ch'ins chatta sin la «glista B» sper Heinz Brand anc auters nums enconuschents sco Valérie Favre-Accola u Roman Hug. Dentant na vul quai dir che Brand ha il sez sin segir, sche la PPS faschess mo in dals dus sezs. En quel cas dependia, co che la Partida saja sa cunvegnida, declera Clau Dermont. Uschia resta avert: Quants sezs fa la PPS e tgi survegn il sez, sch'igl avess da tanscher be per in?

RR Elecziuns 2019